==============
تم تحميل هذه القصه من موقع دنيا الألماس
http://www.s12345.wapka.mobi/
===============

قصة صوري والمعارف والنت

السلام عليكم 

مرحبا اخواني هذي هي القصه الثالثه لي وهي واقعيه وحدثت في احدى بيوت الرياض طبعا انا اخترت هالقصه بالذات انزلها في هالوقت لان الي تعرضت له وحده من بطلات القصه تكرر للمره الثانيه في الجامعه في المستوى الي قبل وصار نفس الشي لبنت واراد الله انها تقدر تحل مشكلتها بسرعه علشان كذا انا نزلتها بسرعه للبنات لاخذ الحذر من هالشي  

فيه ناس تستغرب ليه دائم قصصي فيها عن الخدمه الاجتماعيه والاخصائيه واغلب ابطالها في قسم علم الاجتماع احب اقولهم هذا قسمي ولاني اعاشر هالناس واخذها منهم ومن طالبات من هالقسم 

راح ابدا بعرض اماكن حدوث المواقف ..

اول مكان..



من اكبر مستشفيات الرياض  

ثاني مكان...



جامعة الملك سعود للبنات (شباب لا دققون فاهمين )  

ثالث مكان..



منزل ابو سلطان  


ابطــــال القصه..

سميه..

البنت الكبيره عمرها 24 سنه متخرجه من قسم علم الاجتماع كانت تبي تتخرج من اي قسم بس ماتتوظف مطلقه كانت متزوجه ولد عمها بالغصب وبعد حملها والكشف الطبي اكتشفت إن الجنين الي في بطنها مريض بسبب القرابه الي بينهم بعدها طلبت الطلاق قبل الولاده وبالغصب وافق ولد عمها على طلاقها ورجعت بيتهم مطلقه وفي بطنها اول طفل تحمل فيه وراح نشوف وش يصير فيها 


ناديه..

طالبه في الجامعه قسم علم الاجتماع كانت هذاك الوقت مستوى اول الحين مستوى رابع عمرها 20 سنه تحب الضحك والعب كل البنات يشهدون بأخلاقها ملكة جمال ماشاء الله وهذا الي يحطها في مشاكل


تهاني..

عمرها 17 سنه في ثاني ثانوي تدرس في مدرسه اهليه ذكيه وعاقله رغم صغر سنها الا إن عقلها كبيرعالمها المفضل النت 


سلطان..

عمره 7 سنوات يدرس اولى ابتدائي شاطر في دراسته ودلوع امه 


الاب ...

كانو بناته هم حياته يقدم لهم كل الي يبون ومدلعهم بس قبل 3 سنوات اصابته جلطه سببت شلله نهائي طبعا بعد مرضه اخوه زوج بنته الي هي سميه بالغصب لولده وبعد الطلاق ابتعد عن اخوه وبناته و ولده الصغير وصارت الام هي الي تهتم بالعائله وتصرف عليهم من فلوس زوجها الي عندها وتحاول تلاقي احد ثقه يساعدها في تشغيل الفلوس وماكان قدامها الا خواتها وعيالهم يساعدونها 

طبعا فيه ابطال ثانين لهم دور كبير راح نشوفهم في القصه ..



البـــــــــدايه


سميه كانت في الشهر التاسع ومر على طلاقها 3 شهور وفي يوم والعائله نايمه في الصبح صحو على صراخ سميه كانت تعبانه وتبي تروح المستشفى وبالفعل راحت سميه المستشفى ودخلوها غرفة العمليات وجابت بنت بس كانت مصابه بضمور في المخ وكانت نسبة بقائها في الحياه ضعيفه جدا واذا عاشت بتكون معاقه عقليا وجسديا صحت سميه بعد الولاده وسألت عن المولود وقالو لها انها بنت وفي الحضانه بس ماقالو لها انها مريضه وفي العنايه علشان مايصير فيها شي مع انها كانت تعرف عن مرض الي في بطنها من قبل بس كانت تتأمل خير وكانو خواتها عندها ويحاولون يغيرون الجو الي هي فيه 

ناديه..سميه ايش بتسمي البنوته

تهاني..اكيد على اسمي

ناديه وبسرعه...لا حبيبتي خالتها الكبيره اول 

تهاني..لا احلفي بس تراك ازعجتينا كبيره وكبيره وانتي توك منتهيه من اختبارات الثانويه العامه وماطلعت النتائج الى الان

ناديه وهي خايفه.. يووووووووه ذكرتيني برجع البيت اشوف النتايج على النت الله يستر

تهاني..لا تخافين بتنجحين الدفاره تنقط منك تنقيط 

ناديه..لااله الا الله اعوذ بالله قولي ماشاءالله لا تجي نسبتي في الخمسين

تهاني..لا تخافين بدون ما اقول شي بتجيبي نسبه عاليه

ناديه بأسلوب استهتار..وليه واثقه انشاءالله

تهاني وبثقه...لسبب بسيط نسيتي انك كنتي تدرسين في نفس المدرسه الي انا فيها وهذي كلها لعب مافي شي اسمه دراسه وهم الي يعطونا الدرجات من عندهم وكل شي مسموح تصدقين هذاك اليوم خلود جابت معها جوالها ولا كامير وماقالو لها شي 

ناديه بأستغراب..احلفي افرضي صورت احد 

تهاني..وين انتي يالخوافه مافي احد يصور وين عايشه انتي الدنيا امان


استغربت ناديه من كلام تهاني معها بعدها قررت ترجع البيت وتشوف نتيجتها 

رجعت للبيت علشان تشوف نتيجتها ودخلت على النت وبالقوه طلعت النتيجه وكانت جايبه 94 % وكان حلمها تدخل تربيه خاصه واذا ماقبلوها تدخل علم اجتماع لانها تبي تتعايش مع ذوي الاحتياجات الخاصه وتبي تشوف معاناتهم بسبب الي صار لابوها والي شافته فيه بعدها راحت تتصل بصديقتها في الطفوله وكانت تبيها تدخل معها في نفس القسم واتصلت عليها

ناديه..سلام ياحلووه

مها..وعليكم السلام يالشينه

ناديه..هاااه بشري وش صار طلعت النتيجه

مها..ايه طلعت وجابت معها البشاير 

ناديه بتحمس..وشو وش صار

مها..طلعت نتيجتي وجبت 88% بس مو هذا المهم 

ناديه..اجل ايش

مها..اليوم ولد خالي جا عند ابوي وقرر الزواج هالعطله وبسافر معه للخارج علشان يكمل دراسته

ناديه بغضب..احلفي وانا تتركيني لوحدي وادخل الجامعه بدونك 

مها..وش اسوي هذا النصيب 

ناديه وهي متضايقه ..الله يوفقك والف مبروك 

مها..الله يبارك فيك عقبالك

قفلت ناديه من عند مها وهي متضايقه ماتدري كيف بتدخل الجامعه بدون صديقتها الغاليه وفي النهايه قالت يالله نشوف وش يصير لنا في الجامعه بدون مها بعدها قالت خلاص اروح لاختي في المستشفى واجلس عندها بدال امي وامي ترجع لابوي لانه محتاج لها ولبست وطلعت للمستشفى وبشرت امها وخواتها بنجاحها وهي مستانسه وتبي تدخل تربيه خاصه وهذا حلمها 

بعد شهر من ولادة سميه كانت تتكرر زياراتها للمستشفى يوميا وتطلع منه بالليل علشان تشوف بنتها وتطمن على صحتها وفي يوم كانت رايحه المستشفى و اول مادخلت قسم العنايه لقت الدكتور الخاص ببنتها وصدمها بخبر موت بنتها الي توها عمرها شهر جتها صدمه لانها في الشهر هذا تعلقت فيها مره وكانت تدعي إن الله يطول في عمر بنتها بس الله ماراد الشي هذا وعلى طول اتصلو بوالد الطفله علشان ياخذها ويدفنها بس كانت صدمة سميه إن ولد عمها وزوجها الاول نشر عند الناس إن سبب الطلاق انه كان شاك في اخلاق زوجته وشاف عليها حركات وبسببها طلق سميه علشان الناس ماتقول عليه شي او تلومه على طلاق زوجته وتتكلم عنه وحط كل اللوم على بنت عمه 

سميه اخذت صدمتين في حياتها صدمة بنتها الي ماتت وصدمة ولد عمها الي شوه سمعتها عند الناس وتركها على لسان الي يسوى والي مايسوى وكانت نفسيتها تعبانه وتأثرت من هالشي مرره بس مع مرور الايام قالت لازم اعيش مثلي مثل غيري والله فوق كل ظالم والله ينصرها على ولد عمها فكان اول قرار اتخذته انها ادور لها وظيفه في اي مكان تشغل فيها نفسها وتبتعد عن الهموم وبالفعل اتصلت على وحده من صديقاتها وطلبت منها تساعدها وتشوف لها اي وظيفه في اي مكان 

ناديه كانت مشغوله طول هالفتره بالسؤال عن اقسام الجامعه وعن التربيه الخاصه اذا سهله او لا بس قالو لها إن الدخول في التربيه الخاصه صعب مره ويحتاج احيانا واسطه ونسبتها ماتساعد وفي النهايه قررت تدخل علم الاجتماع وتشوف كيف القسم بس كانت مشكلتها هي صديقتها مها الي بتسافر وبتتركها لوحدها في الجامعه وبالفعل راحت وقت التسجيل وحطت الرغبه الاولى تربيه خاصه والثانيه قسم علم الاجتماع يوم وصلت للمسؤوله قالت لها إن قسم التربيه الخاصه تقفل خلاص بس علم الاجتماع الى الان اذا هي تبيه قالت لها خلاص سجليني فيه 


تهاني كانت مشغوله مع صديقاتها وكانت تسوي اي شي يسوونه وفي يوم كانت جالسه تسولف معهم على الماسنجر ويتكلمون عن ايام الدراسه وعرضت عليهم وحده يدخلون تشات ويستهبلون مع العالم الي فيه وتهاني كانت تتميز بشخصيه حلووه وذكيه مره بمعنى اصح تعرف الي في الشخص والي يبي يقوله من خلال طريقة كلامه وهذا الي ميزها عن خواتها وصديقاتها وبالفعل دخلو الصديقات للتشات وجلسو يسولفون مع الناس و يستهبلون وكان فيه واحد يكتب قصائد وكانت تهاني ترد عليه ومنتبهه لكتابته مع إن الكل منشغل عنه ومو منتبهين للقصائد الي يقولها وفيه منهم من يقوله يطلع مو فاضين للشعر الا تهاني كانت تقوله يكتب قصائد لانها اعجبتها مره وتحس إن في صاحبها شي بس الي كان يكتب قال انه بيطلع ودخلت هي عليه خاص

تهاني..لو سمحت اخوي

الحنون..امري

تهاني..مابيك تطلع ابيك تكمل ابيات القصيده

الحنون..من قالك انه باقي ابيات خلصت القصيده

تهاني..احساسي يقول انه فيه باقي 

الحنون..احساسك قوي ماشاءالله بس انا مشغول وابي اطلع الحين وباكر بدخل انشاءالله في هالوقت وبكمل لك القصيده

تهاني...اوكي بكره انتظرك



طلع الحنون وتهاني تموت وتعرف وش يقصد من هالقصيده و وش سر هالرجال 

ناديه كانت تتجهز للدوام في الجامعه ومتحمسه وفي نفس الوقت خايفه من الجامعه وانها بتكون لوحدها بعد زواج صديقتها المقربه وسفرها للخارج فكان كل همها تقضي من اشغالها علشان في بداية الدراسه تتفرغ لها وتنسى كل شي وفي نفس الوقت خطبها واحد من اقاربها ورفضت لانها متأثره بقصة اختها سميه وتخاف يصير فيها مثل الي صار لاختها علشان كذا رفضت وقالت اهتم في دراستي ومستقبلي غيره لا 

بعد مرور الايام تهاني كانت كل يوم تدخل الدردشه علشان تشوف الحنون بس ماتلاقيه وهي تموت وتعرف ليه ما دخل من هذاك اليوم ولا قال لها قصته وبكره بيكون السبت وبداية اول يوم دراسي 

في الليل سميه جاها اتصال من صديقتها وقالت انها لقت لها وظيفه في مستشفى اخصائيه اجتماعيه ومشرفه على الحالات بس بتكون تحت التجربه ويعرضون عليها حاله وهي الي بتشرف عليها وبتهتم فيها استانست سميه لانها لقت الي يشغلها عن الهموم وفي نفس الوقت كانت شايله هم الناس وش بيقولون عنها اذا توظفت في مستشفى وراح تختلط في الرجال بس اتكلت على ربها وقالت مدام انا محافظه على حجابي ونفسي مايهمني احد 

السبت اول يوم دراسي لناديه في الجامعه وسألت عن المبنى ودلوها له ودخلت وراحت للقسم وسألت عن جداول المستجدات وكان فيه زحمه كبيره عند المكتب بس لفت نظرها بنتين جالسين يستهبلون ويضحكون وفي داخلها تقول والله فاضين مايشوفون الزحمه والقرف وبعد يضحكون وشوي وهي سرحانه جتها وحده من البنتين 

البنت..الي ماخذ عقلك ياحلو

ناديه بخوف..نعم خير اختي

البنت...هههههههههههههههههههههه اسفه شكلي خوفتك بس انا شفتك انا وصديقتي سرحانه وتحدتني اني اخوفك 

ناديه..لاعادي اختي بس كنت افكر وانتي دخلتي علي 

البنت ..ايه لنا الله شوفي بدون مقدمات انا اسمي ساره وتوني مستجده هنا 

ناديه..اهلين وانا ناديه بعد مستجده

البنت..واضح مره انك مستجده من شكلك تعالي خل اعرفك على صديقتي الصدوق هناك

ناديه...ههههههههههههههه طيب مادام فيها صدوق يالله خل نشوف

ساره..هذي هي صديقتي سندريلا 

ناديه..سندريلا من جدك انتي

ساره..ايه من جد لان ابوها يحب هالمسلسل وسماها كذا 

ناديه..لا بس حلو الاسم تقطعه بالعافيه

ساره..هههههههههههههههههههه بجد انك تنكه ياماما شكلك على نياتك انتبهي من هالصفه ولاتصدقين الي ينقال لك الا لين تتأكدين

ناديه..انا تنكه ماعليك زود بس اسدحي لي اسم القمر 

ساره..هذي قمر لا عزالله كدينا خير قولي عنز اصدق بس قمر لا قويه

البنت..اشوفني صرت علكه على لسانك انتي وهي خلصونا لا قسم احوسكم في هالقسم 

ساره..بسم الله كاشت علينا الضب خلاص اعرفك ياناديه على صديقتي الصدوق نجلا 

ناديه..اهلين نجلا تشرفنا بالمعرفه واعذرينا على ثقالت الدم

نجلا..عادي فليها ياشيخه هذي الدنيا ماناخذ منها اي شي كلنا للتراب

ساره..في وجهك يالعنز وش هالسيره اعوذ بالله بومه مو بنت 

ناديه..لااله الا الله متعرفه على عيال مو بنات وين الرقه والانوثه انتي وهي

ساره..يرحم والدينك اي رقه هذي تعرف الرقه خليها بس على ربك

نجلا..سوير ابلعي لسانك لا ابلعكي اياه الحين مفهوم 

بعدها دق جوال ساره وردت عليه وكان اخوها يسأل متى تطلع وقالت انها مطوله وسكرت من عنده وهي تتأفف 

ناديه ..ايش فيك

ساره..ازعجني هالاخو يبيني اطلع وانا ماقضيت يبي يروح يقول عنده موعد

ناديه..وين ساكنه انتي 

ساره..في اخر الدنيا بيني وبين الجامعه في الصبح مشوار ساعه وين تتوقعين

ناديه..شوفي انا ساكنه شرق الرياض وقالو لي اذا بدا الدوام بتأخر علشان الزحمه وانا في الروضه

ساره..احلفي يعني عندنا في الروضه انا ونجلا

ناديه..يعني انتم هناك حلووو بما اننا صديقات خلاص انا اعزمكم تروحون معي كل يوم بدال ما اجي الجامعه لوحدي واطفش في الطريق واخاف من السواق 

ساره..حلو بس شوفي فلوس ماعندي مادفعت لاخوي بدفع لك وبما اني المتحدث الرسمي بلسان العنز نجلا هذا شرطنا

ناديه..هههههههههههههههههههه ياشين البخل اول شي فكرت فيه الفلوس يختي مابي منك شي بس ابي احد يونسني في الطريق

نجلا..حلو اجل كم تدفعين على الوناسه 

ضحكو البنات وكملو سوالف وناديه مستانسه انها لقت صديقات تمشي معهم واعجبها اكثر انهم راعيات وناسه ينسونها هموم البيت الي هي عايشه فيه 

اما سميه راحت للدوام وهي ماتعرف وين تروح بس بعدين قالو لها تروح للمدير وتسأله وتكمل اوراقها وبالفعل راحت له وكملت الاوراق و وداها المكتب الي بيكون خاص لها وقال لها المدير انه بسبب الحاجه لها والضغط مضطرين انها تستلم الحاله اليوم واعطوها ملف المريض الي بتشرف عليه واخذت الملف وجلست في مكتبها تقراه وهي مستغربه من هالحاله الي انحطت فيها وكيف بتعالجها 



يتبع...

--------------------------------------------------------------------------------

رجعو البنات للبيت وكل وحده شايله في بالها الي شافته في الدوام سميه كانت تفكر في الحاله الي استلمتها وكيف بتتعامل معها وتساعدها وليه وصلت هالمرحله من الاضطراب النفسي و ايش الاسباب الي خلتها كذا 

ناديه اول مارجعت قالت لامها عن صديقاتها وانها بتاخذهم كل صباح معها للجامعه و وافقت الام لانها راح تستأمن بنتها مع البنات اكثر من انها تطلع للجامعه لوحدها مع السواق 

تهاني كانت تفكر في الحنون مع مرور الاسابيع مانسته وتموت وتعرف سالفته 

في الليل كانت تهاني داخله النت وتتمنى تلاقي الحنون واول مادخلت الدردشه الي لقته فيها شافت الاسامي وتبحث عن اسمه وكانت صدمتها انها لقته اخير وكانت تفكر تدخل خاص عليه او تدخل الروم الي هو فيها وفي النهايه قررت تدخل الروم وتشوف وش يكتب وبالفعل دخلت ولقته يسولف مع الموجودين وهي ساكته اتابع كلامه فجأه سكت وماصار يكتب خافت انه طلع بس انصدمت انه دخل عليها خاص 

الحنون..لا تسكتين واتابعين شاركينا في الحوار

تهاني..من قالك اني اتابع يمكن معي خاص

الحنون..عارف انك اتابعين الي نكتبه واكبر دليل انك على طول رديتي علي بالخاص وماتأخرتي ولا كنتي مشغوله بالخاص

تهاني..ممكن سؤال

الحنون..امري

تهاني..انت ليه اختفيت يوم طلبت منك تكمل القصيده 

الحنون..لاني ماتوقعت الاقي احد يفهم الي بين الابيات وانصدمت انك فهمتي شي منها علشان كذا قطعتها وماكملتها نهائي 

تهاني..طيب انا امنيتي تكمل الابيات اذا ماعندك مانع

الحنون..والله ما اقدر صعب شوي 

تهاني..اوكي اعذرني على اللقافه ويالله انا بطلع تبي شي

الحنون..بترجعين للدردشه والا لا

تهاني..انا كنت ادخل علشانك ابي اعرف تكملت الابيات ومدام مو مكملها خلاص مابي ادخل نهائي 

الحنون..بس انا ظروفي ماتسمح لي

تهاني..احب اقولك عمر الخيانه ماكانت اخر الحياه لازم الانسان يصير قوي ولا يتأثر فيها

الحنون..اي خيانه ايش تقصدين

تهاني..ابياتك تدل على انك عايش حياه كلها خيانه و موت وفقد ناس تعزهم

الحنون..ماشاءالله عليك انتي كم عمرك

تهاني..العمر مايدل على عقل الانسان فيه ناس اعمارهم كبيره بس تفكيره تفكير اطفال وفيه ناس اعمارهم صغيره بس تفكيرهم تفكير ناس كبار بس كلامي الي انا قلته صح او غلط

الحنون..لاوالله صح وعين العقل بس مستغرب منك ماعمري شفت وحده مثلك 

تهاني..في هالدنيا تشوف العجب يالله انا بطلع

الحنون..لحظه بس انا ابي اكمل كلام معك

تهاني..بس انا عندي دوام بكره وصعب اني اجلس على النت 

الحنون..طيب ممكن اطلب منك طلب

تهاني..امر

الحنون..بصراحه عندي كلام كثير ودي اقوله وانتي مو راضيه تدخلين التشات مره ثانيه علشان كذا ابي ايميلك اذا ماعندك مانع


تهاني كانت تفكر تعطيه او لا بس بعد تفكير ولانها شافت اسلوبه كيف مع الناس قررت تعطيه ايميلها وبعدها طلعت من الدردشه ومن بعدها تعلن علاقتها بالحنون 

ناديه كانت تكلم ساره على التلفون ويقررون الاسبوع الجاي ايش يسوون بحكم انه بتبدا المحاضرات فيه 

ناديه..سارووه تراك قلبتي راسي من اليوم اقولك بنمشي الساعه 6 من البيت قبل الزحمه خلاص

ساره..انتي خبله وش رايك نجيب عزبه معنا ونمشي من خمس الفجر احسن ومايفتحون بوابات الجامعه الا حنا قبلهم ومجهزين لهم القهوه والشاهي

ناديه..اللهم طولك ياروح سوير ترا الاخلاق خربت وبديت اعصب منك 

ساره..ايوووه جت الحاله سكنهم مساكنهم عليك بالقران اقري ياوخيتي يمكن يهجدون بسم الله علينا

ناديه..لاحووول انتي الدنيا عندك مزح ولعب

ساره..اكيد على قول العنز نجلا مصيرنا للتراب 

ناديه..انتي ماعندك سيره تفتح النفس مافيه الا هذي 

ساره..اقول بس تلايطي واسمعي العلم الي يجمد على الشارب

ناديه..تراني بنت مو رجال وهاتي العلم

ساره..من السبت الجاي بنمشي الساعه 7 غيره مافيه اي كلام ولو تقولين كلمه ثانيه لا البس عبايتي وعلى اقرب لموزين ولبيتكم وتحملي الي يجيك فاهمه

ناديه..بسم الله كاشت علينا خلاص يامن شراله من حلاله عله سواقي وتتشرط بعد 

ساره..اقول اقلبي وجهك تحسبيني مثلك وراي طبخ مو مثلك شغاله يالله باي 


قفلت ناديه من عند ساره وهي تضحك على سوالف البنت وبساطتها لانها ماخذه الدنيا ببساطه وبدون هموم ومشاكل مثلها 

في اليوم الثاني سميه كانت تفكر في هالحاله وكانت الحاله عن شاب عمره 26 سنه اسمه سعود تعرض لحادث سبب له شلل بس احتمال يتعالج مع العمليات بس راح يتعافى بشكل بسيط وراح يمشى بمساعدة العكازات غيره صعب مره او مستحيل وكانت شايله هم كيف بتتعامل معه وايش الي خلاه يعيش في هالحاله وتتطور الى إن صار ينام بمهديات ومايتكلم مع اي شخص و من كثر السكوت انقطعو الناس عن زيارته ومحد يزوره الا امه واخته فقط لان ابوه متوفي من زمان وقررت تطلع على الحاله وتشوفها ودعت الله انه يعينها ويساعدها مع انها مهمومه لانها تذكرت ابوها وحالته كيف وراحت لغرفة المريض ودخلت عليه شافت شاب ملامحه حلوه بس فيها تعب كبير مره وكان نايم ومو حاس فيها ابدا كسر خاطرها لان شكله يحزن طلعت من الغرفه وهي متضايقه وتبي تتخلى عن هالحاله لانها مو قادره تتعامل معه هذا وهو نايم كاسر خاطرها كيف اذا صحى 


بعد مرور اسبوع كانت تهاني تدخل يوميا وتكلم الحنون على الايميل وسميه الى الان تفكر في الحاله تكمل معها وترجع تروح له في الغرفه ولا تسلمها اي شخص غيرها وناديه كان اليوم الجمعه وتتجهز للجامعه ومتحمسه لها وفي نفس الليله كانت تهاني تكلم الحنون

الحنون..ممكن اسألك سؤال 

تهاني..تفضل

الحنون..انا من يوم عرفتك لي اسبوع ماعرفت عنك شي حتى اسمك اخذت الي في الشات اسم الحزينه وماحبيت اسألك عن الاسم ولا العمر ولا الدراسه 

تهاني..حاول تخمن طيب

الحنون..صعب اني اخمن لانك قلتيها قبل ماعمر العقل يدل على عمر الانسان وانتي تفكيرك يعطيك عمر 23 سنه واخاف اقوله ويطلع غلط

تهاني..غلط عمري اقل بكثير ولو اقوله لك ماراح تصدق نهائي 

الحنون..لا قولي وبصدقك والله

تهاني..كل شي بوقته حلو مو الحين

الحنون..بصراحه من يوم عرفتك نسيت كل شي صار لي خليتيني انسى همومي ومشاكلي مادري ليه

تهاني..انت ماقلت لي مشكلتك الى الان بس لانك لقيت شي يسليك ويشغل نفسك بس ماراح ترتاح الين تقول الي فيك 

الحنون..يوووه مشكلتي مشكله يبي لها جلسه مطوله بس الحين الوقت تأخر ولازم تطلعين علشان باكر دوامات وبكره اقولك كل شي

تهاني..اوكي بس وعد تقولي مو بكره تقول بعده

الحنون..وعد اقولك 

طلعت تهاني من الايميل وهي بالها مع الحنون و ودها اليوم يخلص بسرعه علشان تعرف سالفته الي اشغلتها 

في اليوم الثاني ناديه وصلت اخوها واختها لمدارسهم وراحت تاخذ صديقاتها علشان يروحون للجامعه واول وحده اخذتها ساره

ساره..صباح الخير 

ناديه..صباح النور وش فيك كايشه

ساره ..مو الحين اقولك خل ناخذ نجلا اول ثم نتفاهم 

بعدها اخذو نجلا من بيتها 

نجلا..سلام ياوحوش

ناديه..يالله صباح خير وحده داخله كايشه علي والثانيه تقول لي وحوش وش فيكم انتم

ساره..اصبري خل اطلع نعالي علشان امردغك في السياره

ناديه..ليه وش سويت انا

ساره..الحين مو متفقين يالتنكه على اننا نطلع الجامعه الساعه 7 وانتي جايتني 7 الا ربع

ناديه..جت على ربع ساعه يعني هذي مشوار الطريق علشان ندخل خريص

نجلا..لا هذي ربع ساعه تسوي فيها ساره الهوايل تفطر وتاخذ لها نومه قصيره واحتمال فيها تتهاوش مع اخوانها

ساره..انطمي انتي محد اخذ رايك خليك في نفسك 

نجلا..صدق لوقيه محد يكلمها اقلبي وجهك يالله 

ناديه..هيييييه انتم ماصارت سياره صارت حلبة مصارعه يالله بس 

ساره..محمد وقف في طريق على جنب

ناديه..ما اسمه محمد اولا ثانيا وش تبين توقفين على جنب

ساره..ابيك انتي او السلقه الثانيه تنزل واجي انا مكانها

نجلا.. ماسلقه الا انتي وبعدين ليه مكانك حلو 

ناديه..حتى استراتيجي تسمع سوالفنا بسهوله جالسه في النص

ساره..لا ابي الشباك ابي اشوف العالم واشم هوا ومع طريقي اقز خلق الله واشوف الخشش الي في الطريق يمكن الاقي احد يفتح نفسي مع الصبح

نجلا.. والله الي بتجيب لنا العار هالبنت يالله هناك قال تبي تقز مابقى الا هي 

ناديه..اقول ماعمر احد سطرك مع الصبح يالدجاجه

ساره..افففففففففف اعوذ بالله مو لسان هذا اهب عليهن 

كان الطريق كله هواش وسوالف وضحك على العالم الي في السيارات الى إن وصلو للجامعه ودخلو المبنى وكانت اول محاضره عندهم ماده من التخصص ودخلت الدكتوره

الدكتوره..بنات ترا القسم سهل للي يحبه وصعب للي مو من رغبتها يعني كل وحده تنتبه

ساره..دكتوره تنصحيني افصل من الجامعه

نجلا..انتي ادرسي اول علشان تفصلين 

ناديه..دكتوره الماده سهله او لا 

الدكتوره..الماده فيها شوية صعوبه بس يبي منكم تكتبون معي علشان تمشون لان ماعندي مراجع 

ساره..بس انا ماحب اكتب

نجلا..قوليها على بلاطه سحليه في الكتابه ماتدرين وين الله حاطك فيه 

ناديه كان بالها مشغول لان فيه شلة بنات جالسين على طرف يناظرون فيها ويتكلمون و ودها تعرف وش سالفتهم وليه مو منتبهين مع الدكتوره وطول المحاضره عيونهم عليها 

بعد ماطلعو من المحاضره وكانت واقفه هي وساره ونجلا مرو من جنبها شلة البنات وقالت وحده لها مع السلامه ياحلوه نجلا وساره ناظرو في بعض وفكوها ضحك على ناديه 

ساره..والله دنيا قايله انا حنا شيف محد مناظر فينا 

نجلا..نعنبو بليسهن مايستحن قسم بالله قلت وش هالرجال الي تكلم 

ناديه وهي معصبه..انتم مو عارفين السالفه

ساره ونجلا بأستغراب..وشو

ناديه..طول المحاضره وهم يناظرون فيني ويشرون لي و وحده منهم تحط يدها على اذنها بمعنى كلميني

ساره..صدق مايستحون ماعاد فيه بنات خلاص

نجلا..لا شوفي الي قالت مع السلامه ياحلوه تقولين رجال انا يوم مرت من جنبي جسمي وقف من الخوف احس انها رجال مو بنت 

ساره..تهقين انها رجال والله شكلي بطالب الجامعه يكشفون على هالسلق الي متشبهات

ناديه كانت خايفه وحركة هالبنات ما اعجبتها وحاسه إن وراها شي بس ماتدري وشو 


في الطرف الثاني كانت سميه في مكتبها وجتها الممرضه وقالت لها إن المريض الي هي مسؤوله عنه تعبان مره و مو عارفين وش فيه 
طلعت سميه بسرعه للمريض وشافته يصارخ ويتكلم بكلام مو فاهمته و وقفت جنبه وحاولت تهديه ومالقت اي طريقه الا انها تقرا عليه قران وشوي بعد ماقرت عليه واخذ المهدي نام وهي ارتاحت وحست إن الشاب فيه هموم الدنيا ويعوضها بالصراخ والانفعال بعده طلعت من الغرفه وسألت الممرضه عن سبب انفعاله وقالت لها مايدرون فجأه سأل عن امه واخته وقلنا له انهم ماجو من امس بعدها جلس يصارخ بدون سبب الى إن وصل هالمرحله 
طلعت لمكتبها وهي تفكر في الام والاخت وينهم ولايكون صار فيهم شي لانه في الملف مكتوب انه ابوه متوفي وهالمريض هو ولدها الوحيد مع البنت فقررت تتصل عليهم وتقول انه ولدها سأل عنها وطالبها وبالفعل اتصلت 

سميه..السلام عليكم

الشغاله..وعليكم سلام

سميه..فين ماما

الشغاله..ماما فيه مستشفى

سميه بأستغراب..كيف في مستشفى انا في مستشفى عند بابا سعود هي مافي

الشغاله..لا ماما مريض في مستشفى 

سميه..اي مستشفى

الشغاله..مستشفى بابا سعود

قفلت سميه من الشغاله وهي مستغربه الام والولد في نفس المستشفى بس وين اي قسم موجوده حزنت عليه كأنه حاس بأمه علشان كذا طلبها بس مشكلتها ماتعرف اسم الام علشان تروح تشوفها لان الاسم مالقته في الملف فقررت تسأل اي شخص يعرف شي عن سعود وعن حالته من الدكاتره او الممرضات لابد انهم يعرفون اسم امه وبالفعل طلعت تسأل عنه 

في الجامعه ناديه كانت تنتظر المحاضره الثانيه وهي تفكر في هالبنات وليش هي خايفه منهم مع انهم سلمو عليها بس 

ساره..وحدووووه يابنت

نجلا..لا اله الا الله تقولين ميت لها احد

ناديه بخوف..تفاولي خير 

ساره..قايله انا بومه هالبنت سيرتها مثل وجهها 

نجلا..لا والله من زين سيرتك انتي اجل احد يقول وحدوووه وش معناها هاااه

ساره..انطمي بس اقوول ناديه انسي ولاتفكرين خل يناظرون فيك مدام الفرجه ببلاش بدون فلوس فليها

نجلا..عرق البخل حتى بالشوف اذا فيه فلوس مافيه 

ساره..اكيد انا ملكة جمال الي يبي يشوفني لازم يدفع فلوس

نجلا..قولي ملكة خياس هم الي يدفعون لك فلوس علشان مايشوفونك 

ناديه..اقول يالديكه انتي وهي يالله للمحاضره 

دخلو البنات محاضرتهم وانصدمت ناديه انها لقت نفس البنات الي شافتهم قبل واول ماشافوها جلسو يبتسمون ويطالعون في وحده من صديقاتهم ويضحكون عليها 



في المستشفى سميه كانت تبحث عن الاسم وفي الاخير لقته وطلبت منهم يشوفون هالمريض فين موجوده وفي اي غرفه وطلعت لمكتبها وبعد نص ساعه جتها الممرضه واعطتها رقم الغرفه وملف المريضه لقت انها متنومه من الليل بسبب ارتفاع الضغط عندها واصابتها بأغماء اخذت رقم الغرفه وراحت لها اول مادخلت لقت بنت جالسه تقرا في كتاب وحرمه كبيره في السن نايمه على السرير وفيها مغذي و واضح معالم كبر السن على وجهها التفتت على البنت

سميه..السلام عليكم

البنت..وعليكم السلام

سميه..هذي الوالده

البنت..ايوه

سميه..كيف صحتها انشاءالله تمام

البنت..الحمدالله على كل حال الاطباء يقولون الضغط رجع لوضعه الطبيعي

سميه..ممكن اعرف سبب ارتفاع الضغط

البنت..بسبب قلقها على صحة اخوي وخوفها عليه وغير كذا جاها اخبار كدرت صحتها 

سميه..ممكن تجين معي المكتب لاني ابي اتكلم معك

البنت..انتي الدكتوره الي مسؤوله عن امي 

سميه..لا انا غير وراح تعرفين كل شي اذا جيتي معي

البنت..بس امي كيف بتركها لوحدها اخاف عليها

سميه..بس صعب نتكلم عندها اخاف تسمع الحكي

البنت..بس صعب اختي اخاف يصير فيها شي ومالي غير الله ثم هي

سميه..انشاءالله ترجع لك بالسلامه هي واخوك

البنت بأستغراب..اخوي 

سميه.. ايه مو اخوك اسمه سعود

البنت بخوف..ايوه لا يكون صار فيه شي

سميه..لا مافيه الا كل خير بس ابي اتكلم معك عنه ويمكن انتي الي بتفيديني

البنت..كيف بفيدك 

سميه..راح تعرفين اذا رحتي معي المكتب انا بنادي ممرضه تجلس مع امك وتهتم فيها الين ترجعين لها 

بعدها طلعت سميه مع البنت للمكتب 

سميه..ممكن اعرف اسمك 

البنت..منى

سميه..اهلين منى احب اعرفك على نفسي انا سميه اخصائيه اجتماعيه المسؤوله عن حالة اخوك 

منى..كيف يعني مافهمت عليك

سميه..اخوك مرضه بسبب الحاله النفسيه الي هو يمر فيها وهذا ناتج عن سبب وانا مهمتي هي معرفة هالسبب ومحاولة مساعدته في تخطي هالحاله والرجوع لطبيعته بس هالشي مستحيل يصير الا بمساعدتك انتي

منى..يعني تقدرين ترجعينه مثل اول ويتكلم معي انا وامي ويرجع معنا للبيت

سميه.هذا يعتمد على الله ثم المعلومات الي تعطيني اياها والمجهود الي بسويه معه

منى..اسألي وانا راح اقولك كل شي

سميه..ابي اعرف كل شي عن اخوك 

منى..اخوي سعود عمره 26 سنه اكبر مني بسنتين توفى ابوي وهو عمره 20 سنه كان توه صغير على انه يتحمل مسؤولية بيت ما اعطته امي اي شي من الفلوس الي تركها لنا ابوي علشان مايضيعها وحبت انه يعتمد على نفسه وبالفعل صار هو الي يصرف علينا يدرس في الجامعه وفي الليل توظف في كبينه مع إن الراتب بسيط بس كان مو مقصر يعطينا منه ولانه كان اول مستوى في الجامعه يجمع الراتب والمكافأه مع بعض ويصرفها ومايبقى معه اي شي يجمعه يوم صار عمره 23 سنه كان في المستوى السادس وصار فاهم ويتحمل انه يصرف فلوسنا ولان تخصصه في الجامعه كان ادارة اعمال هالشي ساعده اخذ الفلوس من امي وصار يسوي مشاريع بسيطه ولانه خبره في الكمبيوتر فتح له محل كمبيوترات ويبيع ويشتري فيه وبعدها اتجه لعالم الجوالات وصار يشتغل فيها والحمدالله قدر يكون راس مال كبير وصار له اكثر من محل للجوالات والكمبيوترات يوم صار عمره 24 سنه طلب من امي تخطبله اي بنت وامي اختارت له البنت الي على مواصفاته وبالفعل وافقو اهلها عليه وصارت الملكه ومع الشهور والزيارات تعلق في البنت وصار يتمنى اليوم الي يتزوجها فيه الى إن قدر الله عليه الحادث قبل سنه وكان عمره 25 واصاب بالشلل مع إن الدكاتره قالو انه يقدر يمشي على العكازات الا إن هالشي ما اعجب البنت الي كان بيتزوجها وبعد شهرين من الحادث طلبت الطلاق منه في البدايه رفض وقال إن اهلها هم الي غصبوها على هالشي ويبي يسمع الحكي منها وبالفعل جت البنت وليتها ماجت قالت له انها تبي الطلاق لانها ماتبي تعيش مع واحد عاجز مايقدر يلبي لها طلباتها ويمشي معها في السوق او اذا كانت تبي تتمشى في اي مكان كانت هذي صدمه له ومن بعدها وهو تعبان ونفسيته متغيره ويحس بالعجز وانه منبوذ ومستحيل احد يفكر انه يقبل بالزواج من بنته مهما كان الى إن جا امس وكنا في البيت اتصلت وحده على امي وقالت لها إن هالبنت انخطبت وزواجها العطله هذي و مو بس كذا لا المحلات الخاصه بسعود بسبب الاهمال ومحد يهتم فيها كل يوم تمر بخساره اكثر من قبل ولان ماعندنا لا ابو ولا اخو ولا رجال يهتم فيها راح تضيع منه 

سميه..لاحول ولاقوة الا بالله بصراحه ماتوقعت حالته كذا انا قلت يمكن بسبب الحادث نفسيته تعبت بس مع هالمصايب مدري وش اقول

منى..انا مع امي الي ارتفع الضغط عندها بسبب هالمشاكل ومع اخوي الي تعبان هذاني عمري 24 سنه بس الي يشوفني يقول عمرها 100 سنه من التعب والارهاق 

سميه..شوفي منى احتمال كبير حالة اخوك اطول علشان يتقبل الكلام ويرجع على طبيعته ومافي غير انتي الي بتهتمين في شغله وفي امك

منى..بس انا ما اعرف في هالشي كيف بهتم فيه حاولت مره بس انلعب علي وخفت اخسره اكثر من كذا 

سميه..انتي ارجعي لامك وانا راح ادبرها لك وانشاءالله راح اهتم في اخوك وانتي اهتمي في امك وربك يحلها 


طلعت منى من عند سميه وجلست تفكر في حالها وكل هالمصايب الي هي فيها و مو عارفه كيف بتساعدها وبتفكر في من علشان تستشيره بعدها جا في بالها شخص يقدر يساعدها وقالت هو الي يقدر يقولي ايش اسوي في هالحاله وكيف اخلي البنت تدير اعمال اخوها بدون محد يستغلها 

في الجهه الثانيه ناديه في المحاضره ومنتبهه للنظرات الي موجهه عليها ومو قادره تسوي شي

ناديه..ساروووه

ساره..هااه لاتقطعين حبل افكاري خل اركز مع الدكتوره

ناديه..امحق تركيز الدكتوره في الصفحه الثالثه وانتي في الاولى يالسحليه 

ساره..طيب اخلصي وش تبين لاني حاسه اني بلقط وجهي وانطرد من القاعه بسببك 

ناديه...مقدر اركز بسبب نظرات البنت الي علي قسم بالله احس بالخوف

ساره..خل تناظر مثل ماتبي جعل عيونها بالفقع طنشيها

ناديه..ماقدرت احس بتاكلني بعيونها شكل بستأذن واطلع من القاعه

ساره..قاعة ابوك هي اقول انثبري وخل انركز الماده صعبه يالخبله 

ناديه..ااااووووف والله لو جالسه جنب نجلا اصرف منك يالسحليه

ساره..صدق خير تعمل شر تلقى انقلعي 

جلسو البنات على هالحاله وبعد ماقضت المحاضره طلعت نجلا وساره يشترون من الكافتريا الي بالمبنى وتركو ناديه تنتظرهم فجأه جتها بنت

البنت..هااااي

ناديه بنظرة استغراب..اهلين

البنت..ممكن نتعرف

ناديه بدهشه..نعم

البنت..صراحه انتي معجبتني و ودي تصيرين صاحبتي

ناديه..والله انا معاي صاحباتي وصعب اتركهم وانتي نفس الشي صعب تتركين صديقاتك وتجلسين معنا

البنت..بصراحه انا اتمنى نكون انا وانتي اصحاب و مابي غيرك وابيك تكونين معي وتتركين صديقاتك والي تطلبينه انفذه لك 

ناديه وهي معصبه..اسفه اختي انا مشغوله ابي اطلع من القاعه وفي نفسها تقول صدق حركات بزران

البنت..انتي فكري في الموضوع وماراح تندمين صدقيني بس اذا رفضتي يمكن تندمين

استغربت ناديه من اسلوب التهديد هذا و ايش تقصد البنت منه وعلى طول طلعت من القاعه بسرعه وكان في وجهها ساره

ساره..هيييه يالمطيوره هدي السرعه بغيتي تشوهين وجهي وجمالي بهالسرعه

ناديه..مو وقته الاستهبال يالله بنطلع من الجامعه 

ساره..احلفي خدامات عندك حنا تتأمرين علينا

ناديه..يالله نطلع وفي السياره اقولكم كل شي 

على طول تركتهم واتجهت للبوابه وساره ونجلا معها وهم مو فاهمين ايش فيها وسبب زعلها وركبو السياره 

ساره..هاااه وش فيه 

ناديه..قايله انا لكم هالنظرات مو لله وراها مصيبه

نجلا..تسمعين بالتشويق انتي اخلصي علينا 

قالت لهم ناديه كل شي

ساره..ههههههههههههههههه ياويلي بطني يعورني لا وتهدد بعد وجه العنز

نجلا..انتي بس تضحكين البنت جاده في كلامها ماتمزح

ناديه..ماعندها احساس هالبنت 

نجلا..شوفي هذي وراها مصيبه والا ليه تقول تبيك صاحبتها لوحدها الا وراها بلا 

ناديه..هذا الي مخوفني علشان كذا طلعت من الجامعه على طول

ساره..طنشيها ياشيخه الدنيا مو على كيفها بعد تهدد 

نجلا..انتي اسكتي ولا تكلمينها ولا تفتحين معها السالفه مره ثانيه وحاولي تتحاشينها وانشاءالله مايصير شي

ساره..صح كلامها واكيد تهديدها بس كلام 

لفت ناديه للجهه الثانيه وهي تفكر وش بتسوي في هالمصيبه 

بعدها وصلت ناديه و سميه وتهاني للبيت وكل وحده شايله في قلبها سالفه وماتقدر تقول لاحد عنها بعدها راحت سميه عند امها وقالت لها سالفة منى وامها واخوها وقالت لها عن الاشخاص الي في بالها 

الام..والله مادري انتي عارفه إن محمد وبدر يشتغلون في السوق ومحمد هو الفاهم اكثر 

سميه..يمه انتي عارفه اني ماقدر اشوف هالبنت المسكينه وما اساعدها والله كسرت خاطري حرام 

الام..خلاص انا بكلم لك محمد و اشوف وش يقول لي 

سميه..خلاص دقي الحين اذا موافق يساعدني قولي له يجيني بكره للدوام علشان اقوله كل شي وياخذ كل الاوراق من البنت 

محمد وبدر عيال خالتهم محمد عمره 25 سنه يشتغل اعمال حره وبدر عمره 23 سنه يدرس في الجامعه ويشارك اخوه في الشغل مربيتهم ام سلطان مع بناتها علشان كذا ماخذين عليهم بس بعد ماكبرو البنات ماصارو يشوفونهم الا نادرا 
كلمت الام عيال اختها وقالها محمد انه مو فاهم عليها وايش الي تبي بس بكره بيمر سميه في دوامها وهي الي تفهمه ويصير خير اذا قدر يساعدها مو مقصر 

تهاني اول ماوصلت دخلت على النت وارسلت للحنون رساله وقالت له انها بتنام وبالليل بتدخل علشان تكلمه 

ناديه كانت مهمومه وخايفه من التهديد الي جاها ولانه هي خوافه مو قادره تسوي شي نامت وهي على هالحال

في الليل صحت تهاني و فتحت النت ولقت الحنون متصل ودخلت على طول عليه



يتبع..


اول مافتحت تهاني النت دخلت على الحنون

تهاني..السلام عليكم

الحنون..وعليكم السلام نوم العوافي 

تهاني..الله يعافيك كيفك 

الحنون..تمام وانتي

تهاني..الحمدالله عايشين

الحنون..عارف انك تبين تعرفين السالفه كلها صح

تهاني..اكيد 

الحنون..راح اقولك قصتي من البدايه للنهايه واتوقع بتسوين مثل غيرك وبعد ماتسمعينها بتتركيني

تهاني..ليه لها الدرجه خايف

الحنون..اكيد لو مو خايف ماطلعت من الدردشه يوم شفتك انتبهتي للقصيده وبديتي تفهمينها 

تهاني..اوكي قول وانا احكم 

الحنون..انا يوم كان عمري 17 سنه توفى ابوي وفقدته صح عندي اخوان اكبر مني بس مع كذا كان همهم الفلوس وماهتمو فيني وامي هي الي كانت تهتم فيني وتسأل وين اروح واجي ولانهم مو فاضين لي كانو يعطوني كل الي ابيه من فلوس والتميت على شله من الشباب وصار همي اطلع الاستراحات معهم والشرب والبنات وطحت في الدخان وما اسمع كلام امي كنت عايش الدنيا لوحدي ولا كأن احد يفكر فيني حتى دراستي طنشتها الى ان صار عمري 20 وفي يوم كنت راجع مع اصحابي من البحرين وحنا في الطريق صار علينا حادث ودخلت المستشفى وبعد ايام صحيت وكان الصدمه لي إن اصحابي الي كانو معي ماتو ومو اي موته ماتو وحنا راجعين بعد ما استانسنا في البحرين وسوينا الي نبي صدق تأثرت بموتهم بس مو مثل ماتأثرت بموت شخص ثاني غالي علي وهي امي بعد ماطلعت من المستشفى ورجعت البيت صدموني اخواني إن امي ماتت وانا مسافر تذكرت كل شي كنت اسويه فيها وصوتي الي ارفعه في وجهها وما البي لها اي طلب يعني كنت عاق فيها تأثرت مره وحبست نفسي في البيت ابتعدو عني اخواني وانشغلو بحياتهم بعدها قررت اكمل دراستي واسوي اي شي كانت امي تتمناه في حياتها وبالفعل قلت لاخواني اني بكمل دراستي بس بسبب كبرسني درستها ليلي وكنت ادرس ثاني ثانوي ونجحت بتفوق بعدها كملت الثانويه العامه وتخرجت بأمتياز ولاني مابي الجامعات هنا قررت اروح بريطانيا ادرس فيها وانا فيها الحين علشان احقق حلم امي وهو اني اصير دكتور وهذاني صابر على الحياه الي انا فيها علشان اثبت للعالم اني اقدر اسوي شي والحين عمري 24 ولي سنتين وانا ادرس هنا لاني ماتخرجت من الثانوي الا في عمر 22 ومارجعت السعوديه الى الان 

تهاني..بس قصتك مافيها اي شي يخلي الناس تتخلى عنك 

الحنون..البنات هنا تبي بس الي يتزوجها وتعيش معه قصة حب واذا عرفو قصتي يقولون اهلهم ماراح يوافقون على واحد راعي ماضي وسوابق وكانت سمعته شينه ومايبون يصبرون لين اتخرج والشباب صح اني كونت بعض العلاقات بس مافي احد يعتبرني صديق له واحاول اتواصل معه ويصير انا وهو اصدقاء 

تهاني..اهاا طيب ممكن اقولك شي بس ماتزعل

الحنون..عادي قولي تعودت على كل شي 

تهاني..انت الي جبتها لنفسك ومحد ظربك على يدك وقال سو هالشي

الحنون..انا عارف هالشي علشان كذا افرغ كل الي احس فيه في القصايد 

تهاني..طيب كيف تبيني اساعدك او بمعنى اصح انت لو تعرف كم عمري بتضحك على نفسك انك قلت لوحده بها العمر هالكلام 

الحون..بس عقلك كبير صح او لا 

تهاني..والعمر شي ظروري بعد

الحنون..طيب كم عمرك علشان احكم 

تهاني..17 سنه

الحنون..العمر كله بس عقلك كبير ومايدل على هالعمر والي اعجبني فيك مع إن عمرك صغير بس يوم كنتي في الشات كان اسلوبك في الكلام مع الشباب واحترامك كان يدل على انك كبيره مو صغيره وهذا شي حلو 

تهاني..مشكور على الاطراء بس ماتلاحظ اني الى الان اقول الحنون وماعرفت اسمك

الحنون..اسمي نواف واعذريني على ازعاجك وتطفلي على حياتك 

تهاني..لا عادي وعلشان اثبت لك انك ثقه انا اسمي تهاني وادرس ثاني ثانوي 

نواف..تشرفنا يا تهاني بس انتبهي لدراستك و ودي اقولك شي بس اخاف تزعلين

تهاني..لا قول عادي

نواف..الدردشه فيها الزين والشين بس للبنت اكبر خطر لانه يسبب لها مصايب وخاصه اذا كانت صغيره علشان كذا حاولي ماتدخلينها مره ثانيه نصيحه مني لان اكثر من بنت ضيعت نفسها في هالدردشه 

تهاني..انا اول مره ادخلها هذاك اليوم مع صديقاتي ومن بعدها ادخل علشان اشوفك ويوم لقيتك مادخلتها مره ثانيه 

نواف..اعرف هالشي حتى الماسنجر لا تستضيفين فيه شباب الا الشخص الي معتبرك مثل اخته ومستحيل يلعب عليك

تهاني استحت من كلامه عنها..غريبه لو غيرك راح يستانس انه مظيف بنت في ايميله

نواف..صح إن الشباب يستانس بس مو كلهم وانا ما حذرتك الا خوف عليك واذا تبين نصيحتي قبل ماتتعاملين مع الماسنجر والدردشه ادخلي المنتديات وشوفي القصص الي فيها عن المصايب الي فيها واقري المواضيع الي تفيدك اكثر من هالاشياء 

تهاني..ابشر راح اسمع نصيحتك

نواف..مشكوره على تقبل كلامي ومازعلتي مني وانا اوعدك ما ازعجك ثاني مره

تهاني..بالعكس انت اذا شفت نفسك فاضي وماعندك شي و ودك تكلم احد انا في الخدمه وماراح احظرك 

نواف.. شكرا ويالله انا بطلع لان عندي اختبار ابي اذاكر

تهاني..الله يوفقك وانتبه لدراستك

طلعت تهاني من الايميل وهي تفكر في كلام نواف ومستغربه نصيحته لها وقالت انها راح تسمعها وماراح تدخل اي دردشه ولا تظيف اي شخص وبتشوف المنتديات الي يقول عنها بس قبل بتسأله اي منتدى تدخل لانها ماتعرف عنها شي 

في اليوم الثاني ناديه وساره ونجلا في الجامعه ويسولفون ويضحكون على سوالف ساره 

ساره..بنات نفسي في شي

نجلا..ايييه بدت الاماني قولي وش نفسك فيه 

ساره..نفسي اتزوج

نجلا و ناديه بأستغراب..نعم

ساره..مو مثل مافهمتو

نجلا..اجل وش معنى الزواج عندك

ساره..ابي اتزوج وانزف واتصور ويمشيني شهر بعدها يقلب وجهه لبيت اهله 

نجلا..ايوووه كملت وتصيرين مطلقه

ساره..بسم الله علي لا ابي اكون عند اهلي واذا طفشت اتصل عليه يجي يمشيني بعدها يرجع لاهله

ناديه..اسكتي لاحد يسمعك ثم بتكونين عانس عند اهلك

ساره..صدق تحطمون الواحد مالت عليكم

وفجأه ناديه تسمع احد يناديها والتفتت انصدمت انها نفس البنت الي كلمتها قبل بس الي استغربته كيف عرفت اسمها من فين جابته 

ساره..جاك الموت ياتارك الصلاه 

نجلا..اللهم طولك يا روح

ناديه..وش اسوي

ساره..قومي نروح مع بعض 

راحو البنت للبنت 

ناديه..نعم اختي امري

البنت..اسمي اروى

ناديه..تشرفنا اخت اروى تبين شي

اروى..ابيك على انفراد

ناديه..اعذريني صديقاتي ما اتركهم وعلى فكره انا اقولهم كل شي 

ساره..انا ونجلا وناديه خوات مانخبي على بعض اي شي

اروى بتأفف..طيب ايش قلتي على الكلام الي صار

ساره..انا اقولك اذا تبين تصيرين صديقه للكل واخت لنا حياك الله ونتشرف اما انك تقولين لناديه هالكلام اعذرينا لا

اروى بغضب..اتوقع سألت ناديه مو انتي

ناديه..وانا ردي هو الي قالته ساره غيره لا 

اروى وهي معصبه..اوكي ناديه انا اروى محد يرفض لي طلب والي يرفض يتحمل الي يجيه مهما كان 

التفتت اروى وابتعدت عنهم والكل مستغرب من كلامها

ساره..الله وش هالغرور الي فيها 

نجلا..ماتستحي ابي افهم وش تبي في ناديه وش النهايه من كل هذا 

ناديه..مدري عنها

ساره..انا مدري كيف ربي بلاني في ثنتين اغبياء واضح الي تبيه

نجلا..نورينا يالذكيه وقولي وش تبي

ساره..البنت معجبه وتبي ناديه تصير حبيبتها بالطيب او بالقوه

ناديه بخوف..نعم حبايب يعني ايش

ساره..ماعمرك شفتي مسلسلات بنت و ولد يحبون بعض هذا مثله بس بين بنت وبنت

نجلا..اعوذ بالله 

ساره..ناديه انتبهي على نفسك هالشي خطر لا توافقين على كلام البنت وتعرضين نفسك لكلام الناس

ناديه انصدمت من الكلام الي قالته لها ساره وتفكر كيف هالشي وكيف بتتصرف فيه 

اما اروى رجعت لصديقاتها وهي معصبه من كلام ناديه وساره وسألتها صديقتها وش فيك

اروى..رفضت تصير صاحبتي شفتي القهر والمصيبه قلت لعبود اني لقيت لي صاحبه وقالي عرفيني عليها علشان يشوف اذا هي تناسبني او لا 

البنت..يوووه ليه تقولين له كان ماقلتي شي الين تثقين في ناديه

اروى..البنت اعجبني جمالها مرره و مدحتها له وقالي اني اذا خليته يشوفها يدفع لي 5000 

البنت..طيب والحل

اروى ..لا تخافين الطريقه عندي الي بخليها تجي غصب عنها مو بس كذا بتطلع معي انا وعبود وراح تشوفين 

سكتت اروى وهي تفكر كيف بتسوي الي في بالها وهي في الداخل مقرره تصير ناديه صديقتها بالغصب


سميه كانت في مكتبها وفجأه دق الباب وانفتح ودخل عليها ولد خالتها محمد

محمد..السلام عليكم

سميه..وعليكم السلام اهلين محمد 

محمد..هلا فيك كيفك

سميه..الحمدالله تمام وانت كيفك

محمد...ولله الحمد هااه وش السالفه

سميه..شوف محمد انا مهنتي لازم فيها السريه واني ما اقول اي شي لاي شخص عن المريض الا اذا هو موافق بس هالحاله لازم اقولك لاني ابي مساعدتك 

محمد..حنا اخوان و الي تبينه ابشري اذا اقدر عليه

سميه..اوكي السالفه هي إن عندي مريض له اخت وام وهو تعبان مره هالمريض عنده محلات ولازم احد يهتم فيها واخته مو قادره لانهم لعبو عليها والام كبيره في السن والحين المحلات صارت تنسرق ومافي اي شخص يساعدهم ومالي غيرك 

محمد..بس كيف وانا ماعندي اي معلومات عن هالمحلات وكيف كانت تشتغل واخاف اصحاب المال مايثقون فيني 

سميه..انا اعرف البنت اذا تبي بجيبها هنا تسمع منها كل شي عن الشغل 

محمد..لا ماله داعي انا راح اهتم فيها لانه مال بنت وامها مالهم ذنب ويحتاجون مساعده بس قبل ابي اعرف كل شي عن هالمحلات

سميه..خلاص انا راح اشوف البنت واتكلم معها بعدها بتصل عليك تجي هنا وتاخذ كل شي وتقولك كل المعلومات

محمد..اوكي انتظرك اول ماتعرفين كل شي قولي لخالتي تتصل علي

طلع محمد من عند سميه وهي اتجهت على غرفة ام سعود علشان تقابل منى 

سميه..السلام عليكم

منى وامها..وعليكم السلام

منى..يمه هذي سميه الي قلت لك عليها

الام..هلا بنتي نورتي بشريني عن سعود

سميه..لاتخافين خالتي هو بخير وانشاءالله بعد يومين راح ابدا الجلسات معه 

منى..هااه بشري سميه ايش سويتي في الموضوع الي قلتلك عليه

سميه..انا كلمت ولد خالتي لانه له خبره في السوق و هو وافق انه يساعدك بس خايف انكم ماتثقون فيه وغير كذا مو عارف كيف الشغل 

منى..من ناحية الثقه لا تخافين اي شخص من طرفك واثقين منه اما الشغل الاوراق كلها عندي راح اجيبها له بس المشكله التوكيل كيف اعطيه 

سميه..المحلات بأسم سعود

منى..لا كل شي بأسم امي

سميه..خلاص الوالده هي الي تكتب له توكيل بس يكون على ادارة المحلات بدون بيع او شراء 

منى..خلاص اتكلنا على الله 

استانست سميه انها قدرت تحل مشكلة منى مع المحلات وباقي لها سعود كيف تغيره بعدها اتصلت على امها وقالت لها تتصل على محمد وتقول له إن البنت وافقت على انه يستلم الشغل وتقوله يجيها المستشفى علشان يتكلم مع البنت وامها وياخذ االكلام منهم وبالفعل الام كلمته وقالت له يرجع المستشفى ورجع له

محمد..رجعنا مره ثانيه هااه وش صار

سميه..هلا والله ابد كلمت الام وبنتها ورحبو بكل شي بس حبيت تشوفهم وتكلمهم بس قبل ابي اخذك تشوف سعود وتشوف حالته علشان تعرف كيف هم مو لاقين احد يوقف معهم 

محمد..يالله خل نشوفه 

راحت سميه ومحمد لغرفة سعود وشافه وتأثر من حالته 

محمد..الحين هو ماعنده عم او خال 

سميه..حسب المعلومات لا حتى عيال خالته اكبر منه ومشغولين عنهم ومايزورونه ولايهتمون فيه مافي غير اخته وامه 

محمد..والله كسر خاطري مره مسكين توه شباب 

سميه..هذا الي كاتبه ربي له ومالنا اي اعتراض

محمد..طيب وين امه واخته ليه مو عنده

سميه..لان الام تعبانه وارتفع عليها الضغط وهي منومه هنا في المستشفى والبنت بين اخوها وامها مره هنا ومره هناك مسكينه احس بتموت من التعب

محمد..الله يعينها ويعطيها الصحه طيب ابي اشوفهم

طلع محمد وسميه وراحو لغرفة ام سعود ودخلو الغرفه بس كانت الصدمه لسميه ومحمد إن منى كانت توها طالعه من الحمام وانتم بكرامه وماكان عليها غطى على وجهها وسميه اول مره تشوفها بدون النقاب انصدمو من البنت كانت ملكة جمال رغم الهالات السود الى حوالين عيونها طلع محمد بسرعه من الغرفه وهو منصدم من الي شافه وفي خاطره مستغرب هالجمال محبوس طول الوقت في المستشفى بين امها و اخوها سميه كانت في الغرفه وقالت لهم إن ولد خالتها هو الي كان معها وجاي علشان يتكلم معهم منى كانت مستحيه من الموقف و مو متخيله كيف بتكلم الرجال و هو توه شايفها بدو نقاب رحبت ام سعود وقالت خليه يدخل 

محمد..السلام عليكم

ام سعود..وعليكم السلام

محمد..اعذريني خاله لاني دخلت بدون استأذان 

ام سعود..عادي ياوليدي ماصار الا كل خير 

محمد..ايوه ياخاله سميه قالت لي كل شي والحين انا جاي وبقولك انا رجال ولله الحمد الله منعم علي و مو محتاج وقبلت اني استلم الشغل بدال سعود واراقبه ومابي منكم اي شي غير الاوراق وتوكيل بالاداره غيره مابي شي

ام سعود..الله يجزاك خير ونردها لك انشاءالله اذا طلع سعود من مرضه

محمد..الله يقومه بالسلامه وتشوفينه قدامك مافيه الا العافيه ومن بكره بجي اخذ الاوراق من سميه وراح اشرف على كل شي ورقمي بعطيه سميه اي شي تبونه حاضر ومردود الشغل بيوصل لك يوميا 

ام سعود..ماتقصر الله يخليك لعين ترجيك ويوفقك دنيا واخره

محمد..هذا الي انا ابيه الدعاء غيره مابي شي والحين انا استاذن وقريب تسمعون اخبار زينه عن الشغل انه رجع مثل قبل واحسن 

ام سعود..انشاءاالله ومشكور مره ثانيه 

طلع محمد من الغرفه وهو يفكر في البنت الي شافها ليه ماتكلمت لايكون زعلت اني دخلت الغرفه بدون استأذان ويقول صدق اني غبي مافكرت إن فيه ناس في الغرفه على طول ادخل بدون ما اعمل حسابي لها الشي 


وفي الجهه الثانيه تهاني كانت في المدرسه وتفكر في نواف لانه شغل بالها وهي سرحانه جتها وحده من صديقاتها وسألتها

البنت..تهاني ايش فيك خير انشاءلله

تهاني..مافي شي بس افكر في موضوع

البنت..وش موضوعه 

تهاني..ابي اسألك اذا شفتي شخص مكسور ومحتاج توقفين معه بس كان راعي حركات وماضي بتخافين منه او لا 

البنت ...الماضي من اسمه تعرفين انه خلاص شي صار وانتهى ومستحيل يتكرر الا اذا الشخص يبي يكرره بس مهمتنا اننا نوقف معه ونساعده على تخطي هالماضي ومساعدته على الرجوع احسن من قبل بس ليش سؤالك

تهاني..مافي اي سبب بس قريت في منتدى مشكله مثل هذي وكنت افكر فيها 

البنت..والله فاضيه قومي خل نروح للفصل افضل 

بعدها طلعت تهاني مع صديقتها وهي مقرره توقف مع نواف وتساعده على تحقيق حلمه وياخذ الشهاده الي بترفع راسه قدام العالم 

بعد يومين من هالاحداث دخلت تهاني الماسنجر ولقت نواف فيه

تهاني..السلام عليكم

نواف..وعليكم السلام هلا والله

تهاني..بشر كيف الاختبار

نواف..الحمدالله تمام

تهاني..كويس كنت افكر لايكون ماحليت

نواف..لا تخافين انا اذا حطيت شي في بالي انفذه

تهاني..حلوو خلك كذا متحمس ولا تيأس ابدا

نواف..وانتي كيف الدراسه ابي تجتهدين وتدخلين ثالث وانتي متفوقه

تهاني..انشاءالله هذاني اشد حيلي بس كنت ابي اسألك سؤال

نواف..امري

تهاني..انت طلبت مني اطل على المنتديات بس انا ما اعرف وابيك تقولي اي منتدى ادخل 

نواف..وش رايك اسجلك معي في نفس المنتدى الي انا فيه وتشوفين مواضيعي وتردين علي

تهاني..اوكي بس كيف انا ما اعرف

نواف..انا اعلمك كل شي

تهاني..اوكي يالله نبدا

بالفعل نواف سجل تهاني معه في المنتدى وصارت هي واياه اعضاء في نفس المنتدى واعطاها المواضيع الي هو كاتبها وقالها كيف ترد عليها تهاني كانت تقرا المواضيع وهي مستغربه من اسلوبه في الاقناع وطريقة كتابته الحلوه والمواضيع المفيده الي اختارها وكانت مستغربه كيف انسان مر بتجارب كثيره هذي كتابته ولقت اشياء كثيره مفيده لها في المنتدى 

كان نواف مبسوط من تهاني وانها تسمع كلامه وقدر يقنعها تترك الدردشه وتنتبه لنفسها كان يحس بشي يجذبه لتهاني ويحس بالراحه اذا تكلم معها عكس الغير واخذ عهد على نفسه انه يحافظ عليها وفي احساسه يقول إن هالبنت غريبه وفيها شي او سر في حياتها مخبيته عنه ويبي يعرفه مهما كان 

تهاني كانت مقرره ماتتمادى بعلاقتها مع نواف وفي نفس الوقت تساعده على تخطي كل المشاكل الي فيه ويعيش حياته مثل باقي الشباب وتحمد ربها انه طرحها في شخص بدال مايلعب عليها نصحها و وجهها لطريق افضل من الدردشه 

في اليوم الثاني في المستشفى سميه اعطت محمد الاوراق الي جابتها منى علشان يبدا الشغل بعدها قررت انه اليوم تكلم سعود وتبدا معه العلاج مهما كان الكلام الي بيقوله لها وبالفعل اتجهت لغرفته


وصلت سميه الغرفه ودخلت على سعود الي كان صاحي بس سرحان اول ماشافها غمض عيونه

سميه..سعود ماله داعي الهروب وياليت تتكلم معي

سعود..قلت لكم مابي اكلم اي شخص مفهوم

سميه..هذا يعتبر خوف 

سعود..اي خوف الي تتكلمين عنه انا انسان ماحب اتكلم مع احد ياليت تتركيني لوحدي

سميه..ماله داعي الانفعال 

سعود..............

سميه...لو كل شخص فكر نفس تفكيرك كان محد عاش في هالدنيا

سعود..اي تفكير تتكلمين عنه

سميه..انت عارف اي تفكير بس قبل ماتتكلم او تقول شي فكر في امك كيف حالها واختك

سعود بأنفعال..امي واختي مافيهم شي عايشين حياتهم ماصار لهم الا كل خير 

سميه حبت تقهره وتحسسه بالذنب..من قال انه ماصار لهم الا كل خير امك مريضه في المستشفى

سعود بخوف..وش فيها لايكون صار فيها شي كله مني انا الي زعلتها 

سميه..حاسس بالذنب على امك ولاحسيته على نفسك والاهمال

سعود..اي اهمال

سميه..صحتك هل فكرت فيها 

سعود..ليه افكر فيها انا ماعاد باقي لي شي والموت ارحم لي من هالحاله

سميه..اي حاله الحمدالله انت بصحتك تشوف وتسمع وتاكل وتشرب وتتكلم

سعود بغضب ..بس ما امشي يعني عاجز

سميه..من قال انك عاجز تقدر تمشي 

سعود..من قاله الاطباء كلام اما في الحقيقه ما اقدر او مستحيل 

سميه..الغيب محد يدري عنه لا انت ولا انا

سعود..ولا الاطباء

سميه..صح بس الله ماخلقنا في هالدنيا علشان عند اول مصيبه نخاف ونسكت ومانسوي شي لا بالعكس لازم نكمل حياتنا ونحاول نعيش

سعود..للعاجز مستحيل

سميه..بالعكس انت شوف المسابقات الرياضيه كيف ناس عاجزين عن المشي كليا ويفوزون بالمراكز الاولى في المسابقات وناس فاقدين البصر ومن اهم المخترعين في العالم وغيرهم كثير الله اذا اخذ شي يعوض الانسان عنه وانت الله عوض عليك انك مو عاجز كليا يعني احمد الله واشكره على هالنعمه 

سعود..بس ايش الي يأكد كلامك اني اقدر امشي

سميه..شوف انا اطلعت على ملفك كامل وقريت تقرير الدكتور يقول انك بعد العمليات تقدر تستخدم العكاز وتمشي عليه وهالشي ارحم من الكرسي المتحرك

سعود..كلها نفس الشي في النهايه عاجز

سميه..انت تخاف من كلمة عاجز وخايف الناس تعايرك فيها مثل الي عايروك

سعود بخوف..من تقصدين

سميه..انت عارف من اقصد بس احب اقولك إن هالشي خيره لك افرض انك تزوجتها وجبت عيال بعدها صار لك حادث وطلبت الطلاق وش بيصير في عيالك

سعود...................

سميه..سعود عيش حياتك وانسى الماضي ودور البنت الي تقبل فيك لاخلاقك ودينك مو لشكلك ومظهرك

سعود..مافيه وحده بهالمواصفات كل البنات يبتعدون عن العاجز 

سميه..صدقني بعد ماترجع لحياتك الاولى وتهتم في امك واختك واعمالك راح تلاقي البنت الي ترضى فيك وبسهوله اما وانت متحطم وعايش بهالطريقه مستحيل تلاقي البنت 

سعود..................

سميه..انا بترك الحين وابيك تفكر في كلامي وتقتنع فيه واذا وافقت عطني خبر وصدقني بساعدك ترجع مثل قبل واحسن 

اول ماطلعت سميه قررت انها ماترجع لسعود الا بعد اسبوع يكون فكر في كلامها وقرر الي يسويه 

بعد مرور اسبوع صار فيه كثير من الاحداث تهاني صارت تدخل كل يوم ساعه الماسنجر تكلم نواف وتشجعه على الدراسه وهو نفس الشي مايتركها الا بنصيحه وتشجيع وفي نفس الوقت يطلب منها تقول له عن حياتها بس هي ماترد عليه , ناديه صارت اداوم في الجامعه وتتحاشى اروى في المحاضرات ومستغربه إن اروى اذا شافتها تبتسم وماتكلمها ,سميه في هالاسبوع حاولت ماتروح غرفة سعود وقررت السبت تروح له 

يوم السبت في الجامعه كانت ناديه جالسه هي وساره ونجلا في وحده من الممرات ويسولفون ويضحكون وفجأه جتهم اروى 

اروى...هاااي

ساره..وعليكم السلام

ناديه..هلا 

اروى..ناديه ممكن اكلمك على انفراد

ساره..قلنا لك من قبل حنا مانخبي على بعض شي

اروى..بس هالشي ظروري 

ناديه..اوكي يالله تعالي

طلعت ناديه مع اروى على جنب 

اروى..ناديه الى الان مصره على كلامك

ناديه..قلت لك حياك الله بينا اخت عزيزه وغاليه غيره اعذريني اختي

اروى.. طيب اذا وريتك شي بتوافقين غصب

ناديه..ههههههههههههه وشو هالشي الي يغصبني على شي انا مابيه

طلعت اروى جوالها وفتحتها واعطته ناديه وقالت لها شوفي

ناديه شافت الجوال وانصدمت من الي تشوفه وبغى يغمى عليها من الصدمه

اروى...هااااه ايش قلتي تبين هالشي وما اعطيه احد نصير اصحاب

ناديه بعصبيه..من فين جبتي هالصوره ومن اعطاك اياها 

اروى..شوفي اللبس والمكان وراح تعرفين وين الصوره وعلى فكره شافها شخص ومدحك كثيرررر و وده يتعرف عليك ونصير انا وانتي وهو اصحاب

ناديه بعصبيه ..من هذا كمان ومو من حقك تورينه صورتي 

اروى..لاتخافين هذا اثق فيه وما اعطيته الصوره من جوالي محتفظه فيها بس اذا رفضتي راح اوزعها وانا عند كلمتي

بعدها لفت وجهها عنها وراحت وناديه كانت مصدومه من الي صار وجتها نجلا وساره

نجلا..هاه ناديه وش تبي

ساره..بسم الله وش فيك وش قالت لك

ناديه وهي تبكي..مسويه المصيبه

ساره وهي معصبه..خير روعتيني وليه تبكين 

قالت ناديه لساره ونجلا كل شي

نجلا..حسبي الله ونعم الوكيل وش هالوقاحه 

ساره..روحي العميده وقدمي شكوا

ناديه..علشان تنشرها صدق وغير كذا اكيد مسويه احتياطاتها علشان ماتنكشف 

نجلا..وش نسوي الحين 

ساره..طيب ماتعرفين احد يقدر يساعدك عمك او خالك

ناديه وهي تبكي..عمي مقاطعنا لو درا الظاهر بيفصلني من الجامعه وعندي خال واحد ومتوفي 

ساره..يالله نطلع من الجامعه وفي السياره نفكر 

طلعو البنت وناديه خايفه من صورتها الي مع اروى 

ساره..ناديه انتي متأكده من الصوره انها لك

ناديه..ايه متأكده مرره حتى وانا جالسه في القاعه وجالسه اضحك 

نجلا..غريبه كيف صورتك واحنا ماشفناها

ساره..نسيتي الجوال بسهوله الوحده تقدر تصور بدون محد يدري عنها 

نجلا..والحل الحين 

ناديه..بفصل من الجامعه

ساره..نعم ليه تهربين من المشكله وثقي انه مو بس انتي الي صار فيها هالشي اكيد مسويته في غيرك 

ناديه..طيب ايش اسوي مو لاقيه حل اما اني اصير حبيبتها لا والله ما اسويها 

ساره..انتي اذا رحتي البيت حاولي تروقين وتنسين كل شي وربك فوقها

ناديه..والنعم بالله بس نسيتي الواحد الي تقول يبي يتعرف علي وش اسوي فيها بعد

نجلا..نعم مبتلشين فيها تجيب معها واحد كملت والله 

ساره..مثل ماقلت لك انتي ارتاحي وفكري وش تسوين بعقل بس نصيحتي لك ماراح احد يفيدك الا رجال غيره محد يقدر يساعدك

ناديه..من فين اجيب رجال وانا ماعندي احد

بعدها سكتو البنت وكل وحده جالسه تفكر وش يسوون و وصلو بيوتهم واول ماوصلت ناديه دخلت غرفتها ورمت نفسها على السرير وجلست تبكي على حالها وتقول لو ابوي بخير كان الحين محد قدر يسوي فيني شي واثناء ماهي على هالحال جتها الشغاله وقالت لها إن فيه رجال يبيها على التلفون

استغربت ناديه من الاتصال الي جاي ومن الرجال الي طالبها وطلعت من الغرفه وهي تقول الله يستر رفعت السماعه 

ناديه..الو

الرجال..السلام عليكم

ناديه..وعليكم السلام

الرجال..كيفك ناديه اعذريني سألت الشغاله عن اهلك وقالت لي مافي البيت الا انتي 

ناديه..من معي

الرجال..ماعرفتيني

ناديه وهي معصبه..لا ممكن تقول من انت 

الرجال..هدي ليش معصبه انا بدر ولد خالتك 

ناديه..اييه اسفه بدر ماعرفتك والله

بدر..لا عادي ماصار الا كل خير بس كنت اسأل عن خالتي فينها 

ناديه..مدري والله انا توني جايه من الجامعه بس اتوقع راحت مع ابوي للمستشفى اليوم موعده

بدر..طيب الله لايهينك بعطيك رقمي واعطيها اياه خل تكلمني علشان اوراق ابوك الي طلبتها منى وانا غيرت الرقم وهذا الجديد

ناديه..طيب هاته 

كتبت ناديه الرقم وقفلت من عند بدر ورجعت غرفتها وهيي تفكر في عيال خالتها الي مو مقصرين معهم كل طلب يلبونه لهم من يوم مرض ابوها وكانت تفكر في بدر وتقول لو اقوله عن مشكلتي بيساعدني او لا بعدها اتصلت على ساره

ساره..هاااه خير انشاءالله 

ناديه..ساره ابي اخذ رايك بشي

ساره..خير 

ناديه..تو ولد خالتي دق يبي امي واعطاني رقمه علشان امي تكلمه وعيال خالتي دايم يهتمون فينا ويخافون علينا وجا في بالي اني اقوله يساعدني

ساره...اوكي قولي له

ناديه..خايفه يشك فيني

ساره وهي معصبه..اللهم طولك ياروح اقول اتكلي على ربك ومالك الا هو يمكن تلاقين الحل عنده

ناديه..والله استحي منه

ساره وهي تتأفف..خلاص لاتكلمينه الحين بكره في الجامعه جيبي الرقم معك ونكلمه بس اخاف يكون نايم

ناديه..لا هو يداوم في الجامعه 

ساره..حلووو اجل بكره تكلمينه عندنا وحنا بنشجعك ولا تخافين مدامك محتاجه له ومالك الا هو ربي يغفر لك 

ناديه..انشاءالله اوكي بكره اجيب الرقم معي ونتقابل 

سكرت ناديه من عند ساره وهي مرتاحه من كلامها وتدعي الله إن بدر يقدر يوقف معها ويساعدها 

سميه كان اليوم هو اخر مهله لسعود وتروح تشوف وش يقول في كلامها اول مادخلت عليه

سميه..السلام عليكم

سعود..وعليكم السلام

سميه..كيفك اليوم

سعود..مثل كل يوم مافي اي جديد 

سميه..فكرت في كلامي الي قلته لك

سعود..فكرت بس ابي اي شي يقنعني

سميه..واذا قلت لك بسبب اهمالك لنفسك ولاهلك المحلات الخاصه فيك كل يوم تخسر وامك بسببك يرتفع ضغطها واختك لو تشوفها ماتقول هذي شباب 

سعود..بس مو بكيفي انا الكل تركني بسبب عجزي ومافي احد بيوقف معي حتى لو بهتم بشغلي كيف وانا في المستشفى 

سميه..الشغل لا تخاف ولد خالتي اخذ الاوراق من امك وهو الي يهتم فيها انت بس الي ابيه منك تساعدني على تخطي هالنفسيه وتسوي العمليات الي قالها الدكاتره وتهتم في نفسك 

سعود..واذا مانجحت العمليه 

سميه..اذا نجحت انت الي بتكسب واذا فشلت ماراح تخسر اي شي 

سعود..اوكي انا موافق بس ابي اقابل الشخص الي ماسك اشغالي ويهتم فيها 

سميه..اوكي ماعندي مانع 

سعود..ليه انتي مهتمه في حياتي مع إن الي قبلك مافكرو فيني اذا رفضت اكلمهم تراجعو وماكملو العلاج معي

سميه..لانك تذكرني بشخص غالي على قلبي 

سعود..كيف مافهمت عليك

سميه..تذكرني في ابوي 

سعود..ابي افهم اكثر 

سميه..قصه طويله في يوم راح اقولها لك 

بعدها طلعت سميه من عند سعود وهي شايله هموم الدنيا لانه ذكرها بحياتها الي كانت تحاول تنساها واتصلت على منى وقالت لها إن اخوها بيسوي العمليه بكره وبعدها اتصلت على محمد تطلبه انه يقابل سعود ويحاول يصير صديقه علشان مايحس بالوحده والعجز و وافق على كلامها بعدها راحت للدكتور وقالت له إن سعود وافق على عملية بكره ورجعت لمكتبها تنتظر محمد يجي يزور سعود

تهاني كانت على النت وتكلم نواف 

نواف..تهاني انا قلت لك كل شي عن حياتي بس انتي لا

تهاني..لاني ما اتوقع إن حياتي تهمك في شي

نواف..من قاله انا قريت الكلام الي انتي كاتبته في موضوعي عن الاب وابي افهم وش قصدك فيه 

تهاني حست بالضيق وتبي تقول لاي شخص ومالها الا هو الي تشكي له

نواف..وش فيك سكتي اذا مو مقتنعه خلاص لا تقولين

تهاني..بالعكس يمكن لو اقول برتاح كثير 

نواف..اوكي قولي وانشاءالله ترتاحين 

تهاني..انا عشت طفولتي كلها مدلعه وابوي مدلعني و مو مقصر علي بشي كل الي ابيه يلبيه لي حتى لو في اخر الدنيا ويوم صار عمري 14 سنه فجأه تعرض ابوي لجلطه اصابته بالشلل الكامل وصار عاجز عن المشي والكلام حسيت إن احلامي كلها ماتت قلت يمكن ربي يعوضني بعمي ويصير مثل ابوي بس صار العكس لقيت عمي قاسي ويحاول يلعب بخواتي وامي واذا قلت اي كلام قالي انتي صغيره وياويلك لو تتكلمين الى السنه هذي وابتعد عنا بسبب طلاق اختي من ولده بس ابتعد وهو مدمر نفسيتي ومخليني متحطمه وصرت اخاف من كل الرجال انهم مثله وكل يوم اشوف ابوي واتذكر الايام الي كان بصحته معنا وكان يضحك معي ويسولف واعطيه كل اخباري واذا زعلت اقوله بس الحين خلاص ماعندي احد خواتي لاهين بحياتهم وامي مشغوله في ابوي وفي اعمالنا وما اقدر ازيد همومها اكثر هذي هي قصتي 

نواف..اهااا علشان كذا كتبتي في موضوعي ياليت اعود طفله واطيح في حضن ابوي وانا استغربت كيف تقولين ابوي عايش وفي نفس الوقت تقولين هالحكي

تهاني..لاني بالفعل اتمنى هالشي 

نواف..طيب واذا قلت لك إن ابوك يتمنى انك تركزين في دراستك وتبعدين هالهموم عنك

تهاني..الهموم صعب ابعدها وانا اشوف ابوي كل يوم قدامي 

نواف..بالعكس شوفته خليها تزيدك اصرار على انك تكملين حياتك وتعيشين

تهاني..انشاءالله اقدر 

نواف..يالله الحين اطلعي ذاكري واجتهدي وبكره نفس هالوقت ادخلي الماسنجر علشان اتكلم معك

تهاني..اوكي

طلعت تهاني وهي تحس بالراحه انها طلعت كل الي في داخلها وشكت همومها لنواف وهو ماقصر معها نصحها تهتم في دراستها 

في المستشفى محمد وصل لمكتب سميه وطلعو لسعود

سميه..السلام عليكم

سعود..وعليكم السلام

سميه..سعود هذا هو محمد ولد خالتي الي ماسك محلاتك 

سعود..اهلين اخوي محمد 

محمد..هلا فيك وانشاءالله قريب تطلع وتمسكها بنفسك

سعود..الله يعين بس ابي منك طلب 

محمد..امر اخوي

سعود..ابيك تهتم في امي واختي وكل الي يطلبونه تنفذه لهم لان مالهم الا الله 

محمد..ونعم بالله بس انت فيه وانشاءالله بترجع لهم قريب 

سعود..والله مدري احساسي يقول العكس

سميه..توكل على ربك ولاتخاف اهم شي لازم تدخل العمليه بدون خوف او قلق لان هالشي يأثر عليك 

بعدها كمل سعود ومحمد وسميه سوالف الى المغرب بعدها طلعو من عنده لان دوام سميه انتهاء ولازم ترجع البيت 

في الليل كل وحده من البنات جالسه تفكر سميه تفكر في سعود وعمليته وكلمته انه حاس انه ماراح يرجع لامه واخته وهي خايفه من عمليته الي بكره , ناديه تفكر كيف بتكلم بدر و وش بتقول له وهو كيف بيفكر فيها تخاف يشك فيها او انها متفقه مع اروى وهذا الي مخوفها من مكالمة بكره , تهاني تفكر في نواف وكلامها معه هل ها الشي صح او غلط وهل هي تمادت في العلاقه معاه و وش بيفكر عنها انها من البنات الي يلعبون وماهمها اهلها او لا ..




يتبع..




في اليوم الثاني في الجامعه 

ساره..هاااه ناديه يالله اتصلي الحين 

ناديه..ساره والله خايفه مقدر

نجلا..ناديه مالك الا هالحل والا انك بتسوين الي تطلبه منك اروى 

ساره..يابنت الحلال تكلمين ولد خالتك ويساعدك افضل من انك تطلعين مع اروى والشاب الي تعرفه وتصير سمعتك على كل لسان 

ناديه..لا خلاص بتصل الحين والله يستر

طلعت ناديه جوالها واتصلت بس محد يرد عليها واتصلت مره ثانيه ونفس الشي محد يرد

ناديه..محد يرد علي شكله مايرد على اي رقم غريب

ساره..لا بالله احلفي مايرد على رقم غريب ليه بنت هو انا اعرف الي مايرد على اي رقم غريب البنات مو الرجال 

نجلا..شوفي الساعه كم معك 8 ونص وهو في الجامعه اكيد عنده محاضره اتصلي الساعه 9 واذا مارد اتصلي 10 هذا اخر حد للمحاضره الاولى 

ناديه..خلاص 9 ونص نتصل هذا افضل وقت وانشاءالله يرد علي 

بعدها جلسو يتفقون على الكلام الي بتقوله ناديه لبدر والي بتسويه وهم مقررين انهم مايحضرون المحاضرات علشان مايشوفون اروى ولا يحتكون فيها الين يكلمون بدر 

سميه دخلت مع سعود لغرفة العمليات وجلست معه لين تخدر وطلعت وجلست مع امه ومنى وهم على هالحاله وبعد ربع ساعه لاحظت فيه حركه غريبه عند الممرضات وعند باب الغرفه وراحت لهم وسألتهم وقالو لها إن المريض الي دخلوه العمليات مريض مره ودخلت الغرفه بسرعه وهي خايفه وسألت الدكتور وقالها إن المريض خدروه وهو خايف وهذا سبب انخفاظ حاد في الضغط ودخل في غيبوبه ومو راضي يصحى ولازم ينقل للعنايه بسرعه لان حالته خطيره 
سميه اول ماسمعت كلام الدكتور خافت وفكرت في امه واخته كيف بتقولهم بعدها قررت تطلعت تقولهم واول ماوصل الخبر لام سعود ارتفع الضغط عندها ودخلوها الطوارى بسرعه اما منى كانت مو قادره تستوعب اخوها الي في العنايه او امها الي في الطوارى وتعبانه 

في الجامعه الساعه 9 وثلث والبنات جالسين يسولفون دق جوال ناديه واول ماشافت الرقم التفتت لساره ونجلا وقالت لهم رقم بدر وقالو لها ترد عليه بسرعه

ناديه وهي خايفه..الو

بدر..السلام عليكم

ناديه..وعليكم السلام

بدر..اسف اختي بس فيه احد داق علي

ناديه..ايه انا اتصلت عليك 

بدر..نعم خير اختي اي خدمه

ناديه..اعذرني بدر بس مالقيت الا انت تساعدني

بدر..نعم من انتي وكيف تعرفين رقمي

ناديه..انا ناديه بنت خالتك 

بدر وهو مستغرب..ناديه 

ناديه.ايه ناديه انا عارفه انك مستغرب بس وش اسوي والله مو لاقيه الا انت الي يوقف معي

بدر..ابشري اساعدك بس انا مو فاهم اي شي منك 

ناديه..انا بقولك كل شي وانت اذا تقدر تساعدني مشكور وماقصرت واذا ماتقدر ماراح الومك واعذرني على ازعاجك 

بدر..لا انشاءالله اقدر قولي وانا اقرر

ناديه..اول مادخلت الجامعه كانت فيه بنت دايم تناظر فيني بس انا ما اعرتها اهتمامي وقلت تناظر بكيفها الى إن جا يوم وطلبت مني اكون صديقتها واترك صديقاتي وانا رفضت وقلت لها مابي وهي هددتني وبعد فتره جتني و ورتني صوره في جوالها وكانت صورتي وقالت لي اذا رافضه تصاحبيني بنشر الصوره

بدر..ماعليش وحده وحده علي انتي ليه ماصاحبتيها 

ناديه..لان الصحبه عندها يعني اصير حبيبتها واصير انا وهي مثل البنت و الولد و مو بس كذا لا تقول انها ورت صورتي لواحد وطالب منها تعرفه علي 

بدر وهو معصب..نعم تعرفك على واحد وتصيرين حبيبتها 

ناديه..ايه 

بدر..شوفي انا عندي محاضره الحين بس انتي مابيك تقابلين هالبنت وتطلعين من الجامعه وفي المغرب انا اكلمك واقولك وش تسوين بس هذا جوالك

ناديه..ايه هذا جوالي

بدر..خلاص المغرب انا اكلمك واقولك كل شي 

قفلت ناديه من بدر وهي تحس بالراحه وقالت لساره ونجلا كل شي

ساره..هاااه صار فيكي شي يوم كلمتيه 

ناديه..لا والله احس بالراحه 

نجلا..خلاص الحين خل نشتري لنا اي شي ونروح عند البوابه لين تفتح ونطلع علشان مانشوف اروى ولا تشوفنا 

قامو البنات وراح يشترون وبعدها على البوابه 

سميه بعد ماتطمنت على ام سعود وبنتها راحت لسعود في العنايه تشوفه اول ماشافته تضايقت لانها تحس بالذنب وانها هي السبب لو انها ما اقنعته بالعمليه كان الحين مافيه شي وصاحي يكلم امه واخته وقررت انها تقدم استقالتها من الشغل بس بعد تفكير اجلت هالشي الين ترجع لسعود صحته ويتعافى ثم تستقيل من الشغل 

تهاني اول مارجعت للبيت ادخلت الماسنجر علشان تكلم نواف بس مالقته واستغربت من هالشي لانه قالها بيقايلها اليوم عليه بعدها قالت اكيد مشغول ودخلت المنتدى بس صدمتها انها لقت موضوع لنواف وفيها يعتذر وانه يودع المنتدى والاعضاء وبيترك كل شي استغربت تهاني هالشي ولانها عارفه قانون المنتدى إن مواضيع ترك المنتدى والوداع ممنوعه راح تنحذف قررت تكتب موضوع له واكيد هو بيقراه وبالفعل كتبت الموضوع ونزلته وقفلت المنتدى والنت وراحت تنام وهي في بالها انه اكيد بيدخل ويرد على الموضوع وبيدخل الماسنجر




يتبع...

في المغرب رجعت سميه للبيت وهي شايله هموم الدنيا وتفكر في سعود وحالته 

تهاني اول ماصحت على طول فتحت النت تبي تشوف نواف ورده عليها ودخلت الماسنجر بس مالقته قالت خل اشوف الموضوع في المنتدى واول مادخلت لقت الموضوع الردود فيه صفحتين استانست قالت اكيد رد علي وشافت الردود بس مالقت رد نواف على موضوعها وهي مقهوره منه وتتوعده على هالشي وتتحلف فيه اذا دخل الماسنجر وارسلت له رسالة ايميل تطلبه يدخل النت اخر الليل لانها تبيه وطلعت تذاكر دروسها 

ناديه صحت من نومها المغرب ولقت رساله من بدر يقول فيها انه بيكلمها بعد نص ساعه وقامت تصلي اول ماقضت من الصلاه الا جوالها يدق وكان بدر 

ناديه..الو

بدر..السلام عليكم

ناديه..وعليكم السلام

بدر..هااه بشري لايكون شفتي البنت اليوم

ناديه..لا سمعت نصيحتك وطلعت بدون ما اشوفها 

بدر..حلوو شوفي انا فكرت في مشكلتك واستشرت صديقي فيها 

ناديه..طيب ايش صار 

بدر..اول شي ابي اعرف هي تعرف رقم جوالك او اي احد في الجامعه يعرفه

ناديه..لا محد يعرفه الا صديقاتي ساره ونجلا ليه

بدر..اجل شوفي انا بجيكم زياره للبيت وبحط لك في المجلس شريحة جوال جديده تستخدمينها في الجامعه

ناديه..ليه وجوالي 

بدر..لا ابيك تستخدمين الشريحه الي اعطيك اياها وبكره داومي في الجامعه وقابلي البنت وقولي لها انك وافقتي على طلبها بشرط الصوره ماتطلع من جوالها واخذي رقمها منها واعطيها الرقم الي بجيبه لك شوي ولاتعطينها غيره حتى رقم البيت لا تعطينها واذا قالت تبي رقم بيتكم قولي ساكنين في بيت جديد والى الان ماركبنا تلفون نبي نستقر اول واذا قالت تبي عنوان بيتكم قولي الى الان اذا استقرينا فيه اعطيتك اياه خلاص

ناديه..اوكي بس ابي افهم ليه هالفه كلها 

بدر..مو الحين اقولك بعدين تعرفين ليه بس اول ماتاخذين رقمها ترسلينه لي وغير كذا رقم جوالي لا تسجلينه في الرقم الي بعطيك اياه واكتبيه في ورقه واذا بغيتي تكلميني اخذيه من الورقه ودقي علي دقه بعدها انا اتصل عليك واذا كنتي في البيت عادي تكلميني من هالرقم هذا بس الجديد لا انتبهي 

ناديه..خلاص اتفقنا بكره انا اخذ رقمها وارسله لك 

بدر..اوكي بكره انتظرك وكل شي يصير لك تقولينه لي ولاتسوين شي من وراي ولاتكلمين احد تقولك عنه الا وانا اعرف ولا تطلعين معها اي مكان الا اذا قلت لك وغير كذا شوي اذا طلعت من بيتكم روحي المجلس وخذي الشريحه منه ورقمها بدون محد يدري عنك 

ناديه..خلاص شوي اذا طلعت دق على جوالي دقه علشان اعرف انك طلعت من بيتنا واخذها و بكره اسوي كل شي

بعدها ناديه قفلت من عنده واتصلت على ساره وقالت لها كل شي

ساره..غريبه ليه مطلع شريحه جديده ومايبيك تقولين لها كل شي

ناديه..مدري انا بنفسي مستغربه وش يبي يسوي 

ساره..احس إن فيه شي 

ناديه..انا بعد احس بس مدري كيف بكره بقول اروى ابي اصير صديقتك 

ساره..لا بتقولين لها غصب عنك وحنا بنشوف وجهك وبنجلس نضحك عليك 

ناديه..هذا همك الضحك الله يعيني ويصبرني لين تنتهي هالمشكله

بعد ماقفلت لقت مكالمه من بدر على جوالها وعرفت انه طلع من بيتهم وراحت المجلس ولقت الشريحه حاطها تحت الكنب واخذتها وطلعت غرفتها وشغلتها واتصلت على ساره دقه وعلى نجلا دقه علشان يحفظون الرقم 

في الفجر تهاني نفس الشي دخلت الايميل ومالقت نواف ولا لقت اي رساله له وشالت همه لايكون صار فيه شي ودخلت على الدردشه تحسبه بيكون فيها بس مالقته وطلعت على طول وطلعت من النت وهي مقهوره منه وتفكر وين راح 

في اليوم الثاني في الجامعه دخلت ناديه القاعه ولقت اروى 

ناديه..السلام عليكم

اروى بأبتسامه.. وعليكم السلام

ناديه..اروى حبيت اقولك اني وافقت على طلبك

اروى وهي مستانسه..جد حلو والله وصدقيني ماراح تندمين

ناديه ..اوكي انا برجع مكاني قبل تبدا المحاضره

اروى..لا تعالي اجلسي جنبي وبعدين ابي رقم جوالك

ناديه وهي مستانسه انها وصلت للي تبيه..اوكي خذي رقمي واعطيني رقمك

بعد ما اخذت ناديه الرقم ارسلته لبدر وهي مستانسه انها حققت اول خطوه تبيها 

بعد مرور اسبوعين تطورت فيها العلاقه بين ناديه واروى وكل مكالمه توصلها ناديه لبدر وهو يقول لها كل شي تسويه وكيف تتعامل معها , تهاني طوال هالاسبوعين ترسل ايميل لنواف وهو مايرسل لها وخايفه عليه وكانت تحسبه محظرها في الايميل وسوت ايميل جديد واضافته بس ماقبل وعرفت انه مقفل الايميل , سميه كانت اداوم في المستشفى واغلب وقتها هي ومحمد ولد خالتها عند العنايه عند سعود وهو في غيبوبه ماصحى منها وكانت شايله همه مع إن الاطباء الى الان مو عارفين متى بيصحى من هالغيبوبه 

وفي يوم وناديه تكلم اروى قالت لها اروى انها تعرفت على واحد وصارت علاقتها فيه قويه مرره وبتقابله قريب اذا حددو هالشي بس الي تبيه من ناديه انها تقابل عبدالله الي هو عبود الي بيدفع لها 5000 ريال اذا عرفته عليها وقالت لناديه تقابله وتتعرف عليه بدالها لانها خلاص عندها غيره بس ناديه قالت لها بعدين ترد عليها لانها في بالها تبي تستشير بدر اول وعلى طول اول ماسكرت من عند اروى دقت على بدر

بدر..هلا والله

ناديه..السلام عليكم

بدر..وعليكم السلام

ناديه..بدر اروى طلبت مني طلب صعب

بدر..وش طلبت منك

ناديه.قالت لي انها تعرفت على واحد وهي من قبل عندها صديق وتبيني انا اتعرف عليه واقابله

بدر..وانتي وش رديتي عليها 

ناديه..قلت لها بفكر وبرد عليها بعدين

بدر..حلووو اذا سألتك قولي لها مو الحين بقابله لان اهلي مايرضون اطلع اوقات دوام الجامعه ومايسمحون لي اطلع لوحدي الا في الاجازات 

ناديه..ليه طيب هالمشوار كله بقولها مابي وانتهينا

بدر وهو معصب..غبيه انتي تبينها تعطيه صورتك علشان تقابلينه بالغصب وتسوي مثل ماسوت قبل 

ناديه وهي خايفه..بسم الله خلاص طيب بقولها مثل ماقلت 

بعدها قفلت من عند بدر وهي تفكر ليش قالها كذا وليش يبيها تقابل عبدالله في العطله وقالت ماراح اقولها قراري الا بعد ما تسألني 

تهاني على حالها كل يوم تدخل وماتلاقي نواف وتطلع وما يأست منه اما سميه كانت في البيت وجاها اتصال من المستشفى قالو لها إن باكر لازم تمر الدكتور الخاص بسعود لانه طالبها ظروري وقالت لهم طيب 




يتبع...


--------------------------------------------------------------------------------

في اليوم الثاني راحت سميه للدكتور في غرفته 

سميه..صباح الخير دكتور

الدكتور..صباح النور

سميه..امر دكتور قالو لي انك طالبني

الدكتور..ايوه سميه ابي اقولك إن المريض الي انتي مشرفه عليه حالته تتحسن بس ماصحى الى الان من الغيبوبه

سميه..ايه اعرف دكتور هالشي 

الدكتور..علشان كذا بعد ماتحسنت صحته انا قررت اسوي له العمليات بس لازم موافقة اهله ومافي الا انتي الي توصلين لهم الحكي هذا 

سميه..بس مافي عليه خطر

الدكتور..لا مافيه انشاءالله اي خطر 

سميه..بس الغيبوبه متى يصحى منها

الدكتور..هذا شي طبيعي مع الايام واستقرار صحته ببيصحى من الغيبوبه

سميه استانست من كلام الدكتور لان طول الفتره الي سعود في الغيبوبه ماكانت تترك العنايه وتهتم فيه لانها تحس انها سبب غيبوبته لانها اقنعته بالعمليه وعلى طول طلعت وراحت لمنى وامها الي كانو في المستشفى يزورن سعود وطلبت منهم يطلعون معها المكتب 

سميه..اعذريني خاله بس الموضوع الي بقوله لك ظروري وطلب مني اقولك هالحكي

ام سعود..وش فيه لايكون سعود فيه شي

سميه..مافيه الا العافيه انشاءالله بس الدكتور يبي يسوي له عمليه 

ام سعود..اي عمليه وهو في غيبوبه

سميه..لا هو حالته مستقره بس الدكتور قال يبي يسوي له العمليه مدام حالته تمام والي كاتبه ربي له بيصير 

ام سعود..يعني ماعليه خطر

سميه..لا انا سألت الدكتور وقالي مافيها اي شي وهذا العمليه خاصه برجوله 

ام سعود..خلاص الي ربي كاتبه له بيصير واذا كاتب له عمر بيعيش وانا واثقه في كلامك يكفي وقفتك معه 

سميه..هذي وظيفتي ولازم اوقف مع المريض مهما كان وانشاءالله خير 

بعد ماطلعت ام سعود وبنتها من عند سميه كلمت الدكتور وقالت له إن اهل سعود موافقين وقالها إن بكره بيبدا في العمليه وهالمره كانت سميه مرتاحه مو مثل المره الاولى الي كانت فيها خايفه من العمليه 

في الجامعه كانت ناديه جالسه وسألتها اروى

اروى..هاه ناديه ايش قلتي في عبدالله

ناديه..انا فكرت في كلامك بس عندي مشكله

اروى..وش عندك

ناديه..انا اهلي وقت الدراسه مستحيل يتركوني اطلع برا البيت لوحدي بس في العطله يوافقون علشان كذا افكر اشوفه في العطله 

اروى..طيب فيه خميس وجمعه عادي تقدرين تطلعين فيها لان مافي دراسه

ناديه..لا هالوقت ماقدر السواق مع اختي الموظفه ومع صديقاتي مستحيل اطلع وبعدين مابقى الا شهر ونقضي من الدراسه 

اروى..خلاص اعطيه جوالك ويكلمك في هالشهر

ناديه..لا لين اقابله وبعدين جوالي امي تستخدمه هالايام لان جوالها مفصول خل يصبر 

اروى ..اوكي اقوله وبخليه يصبر عليك بعد 

وفي هالاثناء دق جوال اروى وردت عليه وبعد ماقفلت قالت لناديه انه الشخص الي تعرفت عليه وهي مواعدته الاسبوع الجاي تشوفه 

ناديه..كيف تشوفينه قدام الناس ماتخافين احد يشوفك

اروى..لا لاتخافين انا راح اشوفه في شقه 

ناديه..شقه لوحدكم ماتخافين منه يسوي فيك شي 

اروى..لا لانه يحبني والي يحب مايضر حبيبه 

سكتت ناديه وهي تفكر في هالبنت الي مو مفكره في كلام الناس وتسوي الي تبيه وين اهلها عنها امها وابوها واخوانها فين وبعدها طلعت من الجامعه وكلمت بدر وقالت له الي صار وقالها تصبر كلها اسبوع او اسبوعين وترتاح من الهم هذا ولا تسأله كيف 

تهاني رجعت من المدرسه وهي نفسيتها تعبانه ودخلت كالعاده النت بس هالمره لقت في بريدها رساله اول مافتحتها الا هي من نواف و مو كاتب فيها الا اسف ماقدرت استحمل اكثر وقريب تعرفين السبب بس اهتمي في دراستك وابي درجات عاليه مثل ماوعدتيني وكان مرسل لها كلامات اغنيه ومعها رابط الاغنيه وكانت الكلمات هي 

فقدتك يا اعز الناس فقدت الحب والطيبه
وانا من لي في هالدنيا سواك إن طالت الغيبه
رحلت ومن بقى وياي يحس بضحكتي وبكاي 
وحتى الجرح في بعدك يغفيني واهليباه 
وانا من لي في هالدنيا سواك إن طالت الغيبه 

اول ماقرتها تهاني استانست وعلى طول ارسلت له رساله وقالت له انها بتشد حيلها في الدراسه وبتجيب الدرجات العاليه بس تبيه يطمنها على صحته وارسلت له الاغنيه الي كلاماتها

غبت يوم وعذرناك وبوله انتظرناك 
يالله ارجع كفايه ابصراحه فقدناك
في غيابك نسينا وش لنا وش علينا 
شاغل البال فينا ليتنا ماتركناك 
انجبرنا نخليك تبتعد عن مراسيك
بس والي يخليك حتى في الحلم شفناك

وارسلتها وهي مبسوطه وقالت مدام ارسل خلاص قريب بيدخل وتعرف وش فيه وسبب تركه النت وعلى طول طلعت وفتحت كتبها تذاكر بحماس 

سميه في الليل تصلي وتدعي إن اليوم الثاني تنجح عملية سعود ويرجع لامه واختها ويوم قضت من صلاتها حست بالراحه ونزلت عند امها ولقت محمد تارك لها ملف فيه ايرادات المحلات حقت سعود يبيها تعطيها اخت سعود اول ما فتحت الملف لقت المبلغ كبير واستغربت واتصلت عليه وقالها إن المحلات رجعت مثل قبل واحسن وهذا المبلغ الي طلع في هالاسبوع لان مكان المحلات تجاري وحلو وهذا الي ساعده وهي تكلمه قالها انه يبي يتزوج ومنى معجبته ويبيها تكون زوجته بس ينتظر اخوها تتحسن صحته استانست سميه لكلامه وقالت له إن منى تستاهل وهي بنت متربيه واخلاق وبعد مايصحى سعود بتاخذ رايها في هالكلام 

في اليوم الثاني دخلو سعود العمليه وكانو خايفين عليه و وش نتيجة هالعمليه بعد



يتبع...

بعد طول انتظار طلع الدكتور من غرفة العمليات ويبشرهم بنجاح العمليه وانهم بينقلون سعود للعنايه مره ثانيه بعد 48 ساعه واستقرار صحته بينقل لغرفه خاصه وينتظرون متى مايصحى من الغيبوبه 

بعد يومين نقل سعود لغرفته الخاصه وعنده امه واخته وطلبت سميه منهم انه يزورونه في الليل ويجلسون عنده و وقت النهار هي بتكون موجوده معه لانها المشرفه عليه كانت الام مستانسه بنجاح عملية ولدها وتتمنى انه يصحى من الغيبوبه قريب 

تهاني في هاليومين مادخلت النت لان كان عندها اختبار وفي هاليوم دخلت ولقت رساله من نواف يشكرها على الاغنيه وانه ماراح يدخل الحين النت الا بعد ماتنتهي من اختباراتها وتجيب درجات عاليه لانه عنده كلام يبي يقوله لها 

ناديه على حالها مع اروى وتحس بالملل من سوالفها الي كلها عن حبيبها وكلامه معها وانه بعد مايشوفون بعض بيقررون الزواج ومتى يجي يخطبها واستغربت مدام هي تحب شاب وتكون علاقه معه ليه تطلب منها تكون صاحبتها وحبيبتها وتسوي هالشي وفي الليل اول مارجعت سميه من المستشفى راحت لها ناديه وسألتها

ناديه..سميه ممكن اسألك سؤال

سميه..وشو وش تبين

ناديه..اذا بنت تحب بنت وفجأه تقلب وتحب شاب ايش معناها 

سميه..ليه هالسؤال 

ناديه..لا بس فضول 

سميه..هذا معناه إن البنت عندها نقص في الحب والحنان وتحس بالاهمال من طرف الرجال وتحاول تعوض هالشي مع البنات و اول مالقته عند شاب تركت البنت وراحت ورا الشاب بس هذا يعتبر مرض نفسي لازم البنت تتعالج منه ولا له مضار في المستقبل على حياتها 

ناديه..اهااا الحين فهمت طيب اذا ماكان عندها مرض نفسي بس تحاول تكون علاقه مع البنات وتسوي حب

سميه..هذا يعتبر مرض وهو إن هرمونات الذكوره عندها اكثر من هرمونات الانوثه ونفس الشي لازم تتعالج منه

ناديه..طيب اذا ماعندها زياده في الهرمونات

سميه..هذا يعتبر تقليد وهذا اخطر شي لان البنت تلقد الثانين بدون وعي وهذا نتيجة اهمال اهلها لها وهذا يحطها في مخاطر كثير هي في غنى عنها 

ناديه..مشكوووره على المعلومات المهمه

سميه..لا شكر على واجب بس اذا كنتي تعرفين وحده كذا انصحيها عن هالطريق واذا ماسمعت نصيحتك ابتعدي عنها علشان ماتضرك 

بعدها ناديه فكرت تنصح اروى وتبعدها عن هالطريق بس بعدين قالت لا لانها تخاف تنشر صورتها او تظرها 

بعد يومين وسميه كانت جالسه عند سعود في الغرفه وهي تقرا كتاب سمعت صوت شخص يتكلم والتفتت لقته سعود يتكلم كلام مو مفهوم وعلى طول نادت الدكتور وقالها إن هالشي يدل على انه بدا يصحى من الغيبوبه واستانست من هالشي وبشرت امه واخته بعدها بساعتين صحى من الغيبوبه وبدا يتكلم

سميه..حمدالله على السلامه

سعود..الله يسلمك وش صار في العمليه 

سميه..انت قبل العمليه دخلت في غيبوبه بسبب الخوف وبعد ماستقرت صحتك سويت عمليه ثانيه والحمدالله نجحت وانت الحين بخير وانشاءالله تتحسن اكثر قريب 

سعود..الحمدالله بس فين امي ومنى 

سميه..انا اتصلت عليهم وبيجون قريب 

سعود..وليه مو عندي وتاركيني لوحدي

سميه..انا عرضت عليهم هالشي لاني اداوم من الصبح للمغرب انا اجلس عندك بعدها هم يجون ويجلسون للصبح عنك يعني نتناوب

سعود..اسف شكلي ازعجتك معي 

سميه..لا عادي بالعكس والله استانست انك رجعت لصحتك 

سعود..مشكوره ماقصرتي والله 

بعدها دخلت ام سعود ومنى عليه وهم مبسوطين وبعد فتره جاه محمد يزوره 

محمد..السلام عليكم

الجميع..وعليكم السلام

محمد..الحمدالله على السلامه

سعود..الله يسلمك

محمد..هاااه بشر كيفك الحين 

سعود..الحمدالله تمااام بشرني انت كيف الشغل 

محمد..الشغل ماشي تمام بس انت انتبه لصحتك الحين علشان تطلع من المستشفى وتستلمه بنفسك 

سعود..الله يعين 

سميه..من بكره راح يبدا معه العلاج الطبيعي بس يبي منه يستحمل الالم الي بيجيه 

سعود..وش فايدة العلاج الطبيعي هذا 

سميه..بيساعدك على استخدام العكازات والمشي بمساعدتها 

ام سعود كانت مستانسه لولدها وانه رجع لها بعد مرضه وغيبوبته محمد كان يفكر كيف بيفاتح سعود في اخته وسعود كان مشغول في سميه وسبب اهتامها الي مالقى له سبب 




يتبع







سعود بدا في العلاج الطبيعي في اليوم الثاني وفي يوم كان جالس مع سميه وسألها

سعود..سميه انتي في يوم قلتي لي إن سبب اهتمامك فيني هو اني اذكرك في ابوك ممكن تفهميني السبب 

سميه بعد سكوت..قصه طويله ماله داعي ازعجك فيها 

سعود..بالعكس مافيه اي ازعاج اذا ماعندك مانع ممكن تقولين لي كل السالفه 

سميه..انا ابوي كان بصحته بس قبل 3 سنوات اصابته جلطه سببت له شلل كامل ومن بعده جتنا المصايب 

سعود وبفضول..كيف جتكم المصايب 

سميه..يوم مرض ابوي عمي طلب مني اتزوج ولده انا رفضت في البدايه لان ولد عمي معروفه سمعته عند الناس وانه قاسي ومايرحم بس عمي اصر علي اتزوجه بالغصب واضطريت اوافق وكنت مخلصه من الجامعه وبعد ماتزوجته شفت العذاب منه وكنت افكر بالطلاق بس ماكان عندي عذر بعدها حملت منه ويوم كنت اكشف على الجنين قالو لي الاطباء انه بيولد مريض بسبب القرابه الي بيني وبين زوجي واخذته عذر وطلبت الطلاق في البدايه رفض بس مع الاصرار وافق وطلقني بعد طلاقي بـ3 شهور ولدت وجبت بنت مريضه وتعلقت فيها مره وبعد شهر من ولادتها ماتت بس ولد عمي ماقصر معي اهداني احلى هديه نشر عند الناس إن بسبب اخلاقي وطلعاتي وانه شاف علي حركات طلقني وهذا الي انا استفدته سمعه مشوهه عند الناس وبنت ماتت ومستقبل مجهول علشان كذا انا توظفت ولقيتك انت وتذكرت ابوي والي صارلي وخفت على منى انه يصير فيها نفس الي صارلي علشان كذا خفت وجلست اهتم فيك 

سعود..الله لايسامحه على هالشي بصراحه ما الومك على الي سويتيه ومستحيل انسى وقفتك معي ومع اهلي 

سميه..انا ماسويت الا الواجب بس اهم شي انك تتقبل العلاج الطبيعي بسرعه وتطلع علشان تهتم في منى وامك 

بعد ماطلعت سميه من عنده جلس يفكر سعود فيها ويقول في خاطره حرام بنت في هالعمر يصير فيها هالشي وش ذنبها يتبلى عليها ولد عمها ويشكك في اخلاقها قدام الناس الله يعينها على الي هي فيه ويعوضها كل خير 

في يوم السبت كان اليوم هو اليوم المحدد لطلعت سعود من المستشفى وفي نفس اليوم تهاني تقضي من اختاراتها الشهريه ولانها ارسلت لنواف رساله تقوله فيها انها اليوم تبيه يدخل الماسنجر لانه تنتهي الاختبارات اليوم وفي نفس اليوم الي بتقابل فيه اروى حبيبها 

سميه بعد طلعت سعود من المستشفى قررت انه تقدم استقالتها لانها ماراح تتحمل اكثر ومستحيل تصبر على حاله ثانيه لانه بطبعها تمل بسرعه وغير كذا تتأثر بالحالات الي تجيها وتسكر كلام الناس عنها وانها ماتوظفت في مستشفى الا علشان تاخذ حريتها وتطلع مع الي تبي بس بعد تفكير قررت تتراجع عن قرارها لان فيه ناس بحاجه لها وعن طريق مهنتها تقدر تساعد كثير من الناس وتوقف معهم وهذا الي هي تبيه 

ناديه بعد صلاة العشاء كلمتها اروى 

اروى..ناديه ابي اقولك شي

ناديه...قولي اسمعك

اروى..ابي انهي كل شي بيني وبينك

ناديه..بس الصوره الي عندك

اروى..انا مسحتها وغير كذا كسرت الجهاز الي هي فيه ورميته علشان ترتاحين 

ناديه..غريبه ليه سويتي كذا لايكون تبتي وبتتزوجين الي تحبينه

اروى..لا اصلا هالشاب انقطعت عنه لانه ما اعجبني اما انتي بصراحه ما اعجبتني صحبتك علشان كذا كل واحد في طريق

ناديه وهي خايفه إن اروى تلعب عليها..متأكده من كلامك

اروى..ايه متأكده وهالكلام اقوله لك ولغيرك 

ناديه..طيب وعبدالله

اروى..لا تخافين بقوله انك تركتي الجامعه وسافرتي ورقمك بمسحه من عندي علشان ماياخذه والحين انا بقفل لاني مشغوله وهذي اخر مكالمه بينا 

سكرت اروى من عند ناديه وهي محتاره وش غير اروى وخلاها تبتعد عنها بعدها تذكرت بدر وقالت خل اقوله كل الي صار لايكون البنت تلعب علي واتصلت عليه 

بدر..هلا

ناديه..السلام عليكم

بدر..وعليكم السلام

ناديه..بدر اروى كلمتني وطلبت منى نقطع العلاقه 

بدر..اعرف هالشي

ناديه..كيف تعرف من قالك

بدر..مو الحين اقولك لان عندي ناس بس شوي اكلمك واقولك السالفه كلها بس اشبكي شريحتك وهذي قفليها نهائي 

ناديه..خلاص بقفلها وبفتح الثانيه بس لا تتأخر ابي اعرف كل شي 

بعد ماقفلت من عنده كلمت ساره ونجلا وقالت لهم الي صار والكل مستغرب من رد بدر و ودهم يعرفون كيف عرف ومن الي قاله وطلبو منها اول مايقول لها تكلمهم 

سميه كانت علاقتها بمنى قويه واتصلت عليها وقالت لها عن محمد ولد خالتها وطلبه وقالت لها إن الي يبيها يجي عند اخوها ويكلمه وهي مالها اي كلمه بعد كلامه استانست سميه لان رد منى يدل على احترامها لاهلها و اخوها وانها مستحيل تسوي شي يغضبهم وقالت لمحمد هالشي وقالها انه في اقرب وقت بيطلبها من اخوها لان البنت مستحيل تتعوض 

تهاني كانت على الماسنجر تنتظر نواف وبعد انتظار طويل دخل الماسنجر وكانت مستانسه 






اول ماشافت تهاني نواف دخل الماسنجر على طول دخلت عليه

تهاني..اخيررررا دخلت

نواف..السلام عليكم

تهاني..وعليكم السلام

نواف..كيفك وكيف الدراسه 

تهاني..الحمدالله تمام وانت كيف دراستك

نواف..الحمدالله انتهت السنه عندنا ونجحت بتفوق

تهاني..ماشاءالله مبروووك 

نواف..الله يبارك فيك عقبالك

تهاني..امين بس ابي اعرف انت ليه اختفيت 

نواف..ظروف

تهاني..اذا مافي احراج ممكن اعرف

نواف..بس اخاف تزعلين 

تهاني..لا ماراح ازعل بس قولي

نواف..تهاني انا اكتشفت اني تعلقت فيك مرره ومابي العب عليك او اوهمك بأشياء بعدين اتخلى عنك 

تهاني..مافهمت عليك ممكن تشرح اكثر 

نواف..انا حسيت اني بديت اتعلق فيك في البدايه قلت هالشي وهم عندي ولازم اقطع علاقتي فيك علشان ماتطور العلاقه بينا وفي النهايه احس إن هالشي وهم واترك محطمه كارهه كل شي بسببي ويجي شخص ثاني ويلعب عليك بس بعد فتره لقيت نفسي اشتاق لك وصرت ادخل اقرا رسايلك ومواضيعك في المنتدى والي اغلبها عني وانك تبيني ارجع كنت اتحسف بعدين اتراجع واقول مستحيل ارجع لها الا وانا متأكد من نفسي واني ابي هالبنت ومابي العب عليها 

تهاني..يعني ايش تبيها

نواف..يعني ابيها تكون زوجتي انا مابي اكون مثل غيري العب على البنت بالزواج والحب لا انا اقولها لك الحين ابي اتزوجك اذا موافقه وتصبرين علي لين اخلص هالسنتين وارجع الرياض ونتزوج اقولك مشكوره اذا رافضه اوعدك ماتشوفيني على الايميل مره ثانيه ولا ادخل عليك 

تهاني..بس انت عارف اني صغيره في السن 

نواف..اعرف هالشي والي ابيه منك قبل ماتردين علي تستشرين اي شخص كبير وتاخذين رايه قبل وشوفي ايش يرد عليك 

تهاني.اوكي انا بطلع الحين وفي الفجر بدخل ومعي الرد انشاءالله

نواف..خلاص انتظرك انا 

طلعت تهاني من النت وهي تفكر في كلام نواف توافق عليه او لا بس في النهايه قالت بعد ما اتعشى مع خواتي اخذ رايهم واقولهم كل شي لانهم فاهمين اكثر مني 

ناديه كانت تنتظر مكالمة بدر وهي على نار تبي تعرف السالفه كلها وهي على هالحال دق جوالها وكان بدر 

ناديه..هلا 

بدر..اهلين فيك اكيد تنتظرين المكالمه

ناديه..اكيد ودي اعرف 

بدر..ابد الله يسلمك صديقتك اخذت درس مني علمها إن الله حق

ناديه..كيف

بدر..في اليوم الي كلمتيني فيه جلست افكر وش اسوي وكيف بحل هالمشكله بعدها جاني صديقي قلت له كل السالفه قالي لا تتصل على البنت وتهزئها لانه ممكن تنشر الصور ونصحني اتغدى فيها قبل تتعشى فيك وسألته كيف قالي حاول تلعب عليها وتعلمها إن الله حق ومثل ماتصور بنات الناس اكيد فيه احد بيجي يوم ويصورها وانت الي عليك تجيب رقمها بعده بنلعب عليها لين نكون معها علاقه ونوهمها بالحب بعده اطلب منها تطلع معك في شقه علشان تتفقون على الزواج واذا دخلتو الشقه صورها بجوالك اكثر من صوره بدون ماتدري واطلب منها جوالها وقول انك تبي تشوف الاسماء الي عندها علشان تثق فيها واذا اعطتك افتح الاستديو اذا لقيت الصوره امسحها بعدها قفل الجهاز واخذ الذاكره منه وكسره قدامها و ورها صورها وقولها انك لو تتصلين عليها او يجيني خبر انك مصوره احد والله لنشر صورك وهذا الي صار وكسرت الجهاز والذاكره وصورها عندي

ناديه..يعني انت الشاب الي كانت تقولي عنه 

بدر..ايه انا علشان كذا طلبت منك ماتتصلين من الشريحه الي اعطيتك اياها ومحد يدري بالسالفه 

ناديه..طيب كيف عرفت صورتي

بدر..انا شفت وحده فيها من ملامح سلطان اخوك وغير كذا حنا متربين مع بعض اكيد بميزك واول مالقيتها على طول حذفتها من الجهاز

ناديه..وانا مدري عن شي انقل الاخبار مثل الغبيه ومدري عن الي يدور من وراي

بدر..اكيد لانك بتعلمين او تغلطين قدامها وهذا الي انا مابيه 

ناديه..والله مدري كيف اشكرك طلعتني من مصيبه كنت بروح فيها 

بدر..مره ثانيه اذا انتي مو مسويه شي لاتخافين نهائي وعلمي اي شخص مهما كان هذي فيها سمعه وافرضي ماقلتي لي وخلتك تطلعين مع الشاب الي قالته وش بتستفيدين 

ناديه..والله انك صادق وانت ماقصرت معي وجميلك بشيله فوق راسي 

بدر..مابي منك اي شي الا اذا احتجتي مساعده تتصلين علي وتطلبين غيره مابي 

ناديه..خلاص انشاءالله 

بعدها قفلت ناديه من بدر وهي مستانسه انها حلت مشكلتها وارتاحت من الهموم والمشاكل الي كانت بتطيح فيها وعرفت إن كل شخص بيسوي الغلط لابد يجي يوم ويرجع عليه وهي ماتدري بعد هالمشكله وش بيصير لها هي وخواتها من مصايب تغير حياتهم بشكل نهائي 

تهاني كانت تفكر في نواف و وش تسوي في طلبه وجت على بالها ناديه وسميه تقولهم السالفه وهم ينصحونها مع انها كانت خايفه من هواشهم على الي سوته وانها تعرفت على شاب عن طريق النت 

بعد تفكير قررت تهاني تستشير خواتها وراحت لهم في الغرفه 

تهاني..ابي اقولكم شي بس مابيكم تزعلون مني

ناديه..وليه نزعل مسويه غلط انتي

سميه..تهاني قولي الي عندك حتى لو غلط مستحيل نهاوشك او نظربك لان كذا بنساعدك على الغلط مو نصححه

ناديه..صح لانك لو انهنتي او ظربناك بتكررين الغلط عناد فينا 

تهاني..خلاص شوفو انا تعرفت على واحد عن طريق النت ويبي يتزوجني

ناديه وسميه انصدمو من كلامها و مو فاهمين لها 

سميه..تهاني قولي لي السالفه من الاول مو النهايه ابي افهم 

قالت تهاني كل شي من اول يوم عرفت فيه نواف الى اليوم الي طلبها فيه 

سميه..شووفي هالشاب مايبي يلعب عليك وهذا واضح من كلامه لانه لو يبي لعب كان استغلك من زمان وجلس يقولك عن الحب وعن كيف بتعيشون ومن هالكلام الي يعطيه الشاب البنت لين تطيح بس هذا عكس

ناديه..صح كلامك وغير كذا اختفى وماحب يزعجك لين تأكد من شعوره اتجاهك وجاكي وقالك انه يبي يتزوجك وطلب تفكرين وتستشيرينا وغيره نصايحه لك 

تهاني..طيب والنهايه ايش اسوي

سميه..انتي صغيره الى الان وهو باقي له سنتين او اكثر فيها تكونين انتي كبرتي وصرتي اكثر عقلانيه وتقدرين تقررين وش تبين بس اذا تبين نصيحتي هالشاب ماينتفوت لانه صادق

تهاني..حتى لو له ماضي عادي توافقون

سميه..كل شخص له ماضي مهما كان وهالماضي يا شين او زين بس الانسان العاقل الفاهم هو الي يستغل هالماضي ويعدل فيه وهذا الي سواه نواف وروحي اسألي عنه عند اهله الحين تلاقينهم يفتخرون فيه 

تهاني..يعني اوافق عليه 

سميه..ايوه وافقي عليه وشجعيه على تكميل دراسته بس مو تستغلين هالشي وتجلسين تكلمينه وتسوين علاقه من ورانا لا هالشي ماتسوينه او تفكرين فيه احترمينا واحترمي اهلك الي وثقو فيك واعطوك هالجهاز علشان تستفيدين منه مو تستغلينه بهالاسلوب 

تهاني..خلاص انا اقوله وبفهمه على كل شي اذا وافق اني ما اكلمه وانه يجتهد في دراسته ويتخرج بعدها يخطبني غيره لا 

ناديه..ايوووه هذا هو الي نبيه 

بعدها طلعت تهاني من عند خواتها وهي مبسوطه لانها لقت من يوقف معها وينصحها وجلست على هالحال الى الفجر وبعدها دخلت النت ولقت نواف

تهاني..مرحبااا

نواف...اهلين هااه بشري وش قررتي

تهاني..مستعجل

نواف..اكيد 

تهاني..انا استشرت خواتي ونصحوني بنصيحه وانا وافقت عليها واذا ماعجبتك بكيفك

نواف..وش قال لك 

تهاني...انا موافقه على كلامك بس بشرط انك تتخرج وتجيب درجات عاليه وماتطلب مني اكلمك طول هالسنتين ادخل الماسنجر مره في الاسبوع اكلمك واخذ اخبارك غيره لا 

نواف..كلامهم حلوو ويدل على خوفهم عليك وهذا من حقهم وانا موافق عليه بس مثل منتي لك شروط انا بعد

تهاني..وشو شروطك

نواف..مو تفكرين اني بتزوجك خلاص ماتفكرين في الدراسه لا ابيك تتخرجين بأمتياز وتدخلين الجامعه وتهتمين في ابوك وامك وش قلتي

تهاني..خلاص موافقه 


طلعت تهاني من الماسنجر وهي مستانسه إن ربي رزقها برجال صالح مستحيل يضرها او يستغلها مثل الغير واتخذت قرار انها تجتهد في دراستها وتسمع كلام نواف 

بعد شهر من هالاحداث انصدمت ناديه بأتصال على جوالها وكان رقم ماتعرفه 

ناديه..نعم

الرجال..مرحبا

ناديه..نعم من معي

الرجال..انتي ناديه 

ناديه..خيررر من انت

الرجال..لاتحسبيني مقدر اجيب رقمك حتى لو غيرتيه

ناديه..ومن انت علشان تجيب رقمي

الرجال..انا واحد انتي معجبته ويبي تكونين صديقته 

ناديه..نعم 

قفلت في وجهه وهي خايفه ومو عارفه تتصرف وتحس الصوت مو غريب عليها بس ماتتذكره وجلس الرجال يدق عليها وهي مطنشه وماترد وارسل لها رساله كان يقول فيها ياتردين او اني اوزع صورك استغربت اي صور و وش سالفته ما جا في بالها الا اروى بس بدر كسر الجهاز قالت هذا اسلوب يهدد فيه ومافكرت فيه بعد يومين وهي في الجامعه دق جوالها وكان نفس الرقم 

ساره ..ردي اقلقنا جوالك

ناديه..مابي هذا المزعج الي قلتلك عليه 

ساره..ايييه هذا هو هاتي خل ارد انا 

اخذت ساره الجوال وردت عليه

ساره..نعم

الرجال..اخيرا رديتي 

ساره..جعل اخرتك قريبه قول انشاءالله 

الرجال..وانتي معي

ساره..الله لايوفقك ويحطها في وحده من خواتك 

الرجال..ماعندي خوات 

ساره..اقول لو تتصل مره ثانيه ماتلوم نفسك 

الرجال..وش بتسوين يعني بتقولين لابوك اتحداك 

انقهرت ساره وحمدت ربي انه مو ناديه الي ردت وسمعت هالكلام وقفلت في وجهه

ناديه..هاااه وش قال 

ساره..واحد مايستحي مالك الا بدر دقي عليه 

ناديه..ياذا بدر الي ازعجته والله صرت استحي منه

ساره..تكلمينه او انا اكلمه 

ناديه..اشوفك اخذتي على جوالي وتكلمين الي تبين 

ساره..لاحووول دقي عليه يالله 

اتصلت ناديه على بدر وهي مستحيه منه

بدر..هلا ناديه

ناديه مستغربه..بسم الله انا لي شهر ما كلمتك كيف عرفت رقمي

بدر..لاني حافضه عندي اول مادقيتي طلع الاسم الي حافضه فيه وعرفتك 

ناديه..ايوووه بدر اعذرني على ازعاجك بس وربي مالي الا انت تساعدني

بدر..خير وش فيه 

قالتله السالفه والتهديد الي جاها

بدر..ابي اعرف وش سالفة صورك انتي مع العالم مافي غيرك يصورونه

ناديه..مدري عنهم مو من زيني 

بدر..هههههههههههههههههه خلاص لاتخافين هالرجال انا بتصرف معه ومدامك معجبته بخليه يجي يخطبك

ناديه..نعم نعم ليه شايفني عاله على اهلي انا مابي اتزوج

بدر..مو على كيفك غصب عنك 

ناديه..لا مابي وبالذات هالغبي المزعج مابيه لو يموت 

بدر...اقووول مو كل الرجال مثل ولد عمك وانا عرفت انك رفضتي كل الي جوك بسبب الي صار في سميه من ولد عمك

ناديه..الا كلهم زي بعض ويتشابهون

بدر..حتى انا مثلهم

ناديه وهي متلخبطه..لا مو شرط بعدين خلاص قفل على السالفه مو شرط اتزوج

بدر..ناديه الي دق عليك انا مو رجال غريب وحبيت اشوف وش تسوين بدقين على والا لا واذا دقيتي اعرف انك واثقه فيني علشان كذا قلت اختبرك والحين انا ابي اخطبك وشاورت اهلي كلهم وامك والكل موافق وباقي انتي وانا سويت كذا علشان اثبت لك انه اصابع يدك مو سوا والرجال يختلفون 

ناديه.....................

بدر..ياشين الخوف بس قولي للي ردت علي تو مدري من تستغفر دعوتها شينه ومابي يصير في اهلي شي يالله انا بقفل الحين وانت استخيري وردي علي

قفلت ناديه وهي خايفه 

ساره..هاااه وش قال بيساعدك

ناديه..اسكتي لو تدرين وش السالفه وقالت لها كل شي

ساره...ههههههههههههههههههههههه ياسلام والله فله ليت ربي يطرحني في رجال مثله 

ناديه..تبينه خذيه

ساره..بضاعه هو تعطينه الي يبي 

نجلا..خيرررررررر وش عندكم مجتمعين

ساره..الحقي شوفي اقرب مصمم علشان نفصل فساتين

نجلا..ليه وش صار

ساره..ابد وحده منا بتتزوج 

نجلا..من وانا مدري ومتى صار هالشي ومن العريس ومتى الموعد

ساره..وجع وجع هدي كل هالاسئله بجاوب عليها اختاري واحد

ناديه...والله فاضين ماصار شي وخل افكر اول بعدين ارد عليه

بعدها غيرو البنات الموضوع وهم مصرين إن ناديه توافق على طلب بدر مهما صار 

في نفس الوقت في هالشهر سميه صارت معروفه في المستشفى بسمعتها الحلوه وتعاملها مع المرضى والكل يحبها وفي يوم جاها ولد عمها المستشفى 

فهد..السلام عليكم

سميه وهي مستغربه..وعليكم السلام نعم

فهد..كيفك وكيف عمي

سميه..الحمد الله انا بخير اما عمك لو تعرفونه صدق ماتركتوه طول هالشهور وماسألتو عنه 

فهد..علشان كذا انا جايك علشان اسأل عنه وعنك 

سميه..حنا بخير ومو محتاجين اي شي غيره تبي شي ثاني انا مشغوله

فهد..ايه انا جاي اتفاهم معك واسكر كلام الناس عنك والمك وارجعك على ذمتي مره ثانيه

سميه وهي معصبه ..كلام الناس انت الي بديته ولا راعيت القرابه الي بينا وشوهت سمعتي عند العالم وجاي الحين تبي ترجعني اعذرني مافي اي نصيب بيني وبينك

فهد..مو على كيفك انا ولد عمك واحق فيك وشوفي نفسك الى الان محد يبيك علشان كذا انا بضفك 

سميه وهي معصبه..مابيك تضفني و مو محتاجه لك وياليت تطلع برى ونصيبي بيجيني والي كاتبه ربي لي باخذه سوا عندك او عند غيرك 

عصب فهد منها وطلع من المكتب بس كان في نفس الوقت الي فهد وسميه يتكلمون كان فيه شخص عنده مراجعه في المستشفى وقرر انه يزور سميه ويسلم عليها ويشكرها على كل شي سوته له وسمع الكلام وكلام فهد واستهزأه فيها وانقهر منه وطلع من المستشفى وهو معصب 

رجعت سميه للبيت وهي مقهوره من كلام ولد عمها وفي نفس الوقت تتمنى تشكي لاي شخص بس يوم وصلت البيت كانت قدامها مصيبه 

--------------------------------------------------------------------------------

اول ماوصلت البيت لقت الدنيا مقلوبه وسألت الشغاله قالت لها إن ابوها تعب مرره واخذته امها المستشفى هي وناديه وتهاني وعلى طول طلعت للمستشفى القريب من البيت وقالو لها إن ابوها جته جلطه ولازم ينقل الى اي مستشفى كبير وعلى طول طلبت نقل له للمستشفى الي هي تشتغل فيه 

جلست سميه وخواتها مع ابوهم في المستشفى لمدة 3 ايام وكانت حالته تعبانه بعد اليوم الثالث صدمهم الدكتور بموت ابوهم بسبب كثرة الجلطات الي اصابته كانت صدمه على البنات وكل وحده حالتها تعبانه 

سميه كانت شايله هموم الدنيا بحكم انها الكبيره وبدون رجال كيف بيمشي البيت كانت صدمة موت ابوها قويه عليها بس قدرت تصبر على هالشي تمر في مواقف محزنه من خواتها بس تحاول تواسيهم مهما كان كانت منى موقفه معها وتتصل كل يوم فيها وتسأل عنها وعن امها وخواتها 

ناديه..اصابها صدمه من موت ابوها وكانت تقول الحين من الي بيهتم فينا الكل بيستغلنا واولهم عمي ليه يصير فينا كذا اخوي صغير ومو قادر يتحمل مسؤوليتنا صديقاتها نجلا وساره ماقصرو معها ساعدوها و وقفو معها وكانو المحاضرات يحضرونها فيها ويجيبون لها كل شي علشان ترجع مثل اول 

تهاني لانه كانت الدلوعه وابوها ماقصر معها كانت اكثر وحدها تأثرت بموته ودخلت المستشفى بسبب انهيار عصبي اصابها وكانو خواتها يحاولون يغيرون الجو عليها ويساعدونها بس ماقدرو فكرت سميه وقالت إن تهاني ماتسمع كلام الا ابوها الله يرحمه و نواف علشان كذا قدرت تدخل على ايميلها بدون ماتدري وكلمته

نواف وهو معصب ..تهاني وين كنتي لي شهر ادخل ما الاقيك

سميه..اسفه اخوي انا مو تهاني

نواف..من انتي و وين تهاني

سميه..انا اختها وتهاني تعبانه

نواف بخوف..وش فيها ليه تعبانه

سميه..شوف يمكن الي انا اسويه غلط وهو اني ادور شاب علشان يساعد اختي بس لاني اعرف انه انت الي تقدر تساعدني علشان كذا لجأت لك 

نواف..قولي وش فيه والله خوفتيني

قالت سميه كل شي لنواف وان تهاني كل يوم مودينها المستشفى ومتأثره الى الان

نواف..لاحول ولا قوة الا بالله عضم الله اجركم اختي بس كيف اكلمها الحين 

سميه..والله مدري انا مالقيت الا انت قدامي 

نواف..طيب هي فين الحين

سميه..هي في المستشفى منومه من امس 

نواف..طيب تسمحون لي اكلمها في المستشفى

سميه..انت عارف إن هالشي اكبر غلط بأي صفه بتكلمها 

نواف..صدقيني ما اكلمها غير هالمره تهاني ماقصرت معي و وقفت معاي في مواقف كثيره ومابي الي صارلي يوم توفى ابوي يصير لها 

سميه..اوكي انا بعطيك رقم المستشفى بس لا تتصل الا الساعه 7 بتوقيتنا لاني بكون عندها 

نواف..خلاص انا موافق ابتصل بقولك محمد موجود اذا قلتي لا اعرف انه فيه احد او مو انتي الي رديتي علي 

سميه..خلاص اتفقنا 

طلعت سميه من الايميل وهي تحس بالخوف وتقول انشاءالله مايصير الا كل خير لازم اوقف مع اختي وماوافقت يكلمها الا عارفه نيته بالزواج منها مو يلعب عليها وطلعت غرفتها ترتاح لين المغرب علشان تروح لاختها في المستشفى 

ناديه كانت مع تهاني في المستشفى وحالها متغير مرره واضح عليها الحزن وهي جالسه تفكر في حياتهم كيف كانت وابوهم وش الي كان يسويه لهم وكيف كان يدلعهم وفجأه يختفي من حياتهم في لحظه وهي جالسه تفكر وصل جوالها رساله وفتحتها وكان رقم بدر مرسل لها مثل كل مره احاديث وادعيه كانت تستانس من هالشي لانه كل ماقرتها تحس بالراحه وتشكره عليها بس في داخلها خلاص بعد موت ابوها مستحيل تتزوج تبي تجلس مع امها واختها تهتم فيهم مع سميه وهي تفكر دق التلفون وردت وكان نواف قالها محمد موجود قالت لا وقفلت على طول بعدها دخلت سميه عليها 

سميه..السلام عليكم

ناديه وتهاني..وعليكم السلام

سميه..هااه تهاني كيفك

تهاني..بعد ابوي مو بخير 

ناديه..تعوذي من ابليس والميت ماتجوز عليه الا الرحمه

سميه..الله يرحمه بعدين انا جايه وجايبه معي مفاجأه

ناديه..وش جايبه

سميه..خلي اللقافه بعدين فيه احد اتصل على التلفون

ناديه..ايه واحد يبي محمد قلت غلطان وامي غيرهم لا 

في هالحظه دق التلفون وقامت ناديه ترد 

سميه..لا تردين انا برد

سميه..الو

نواف..السلام عليكم

سميه..وعليكم السلام

نواف..محمد موجود

سميه..ايه موجود لحظه هذاهي معك 

سميه..تهاني ردي على التلفون وحده تبيك 

تهاني..مابي اكلم احد تعبانه شوفي من وبعدين اكلمها

سميه..لا هذي خاصه تبيك ظروري خذي خسرتي البنت بسرعه 


اخذت تهاني السماعه علشان ترد 




يتبع....

تهاني..الو

نواف..مرحبا تهاني

تهاني وهي منصدمه..من معي

نواف..اكيد ماتعرفيني لانك ماسمعتي صوتي

تهاني..انت محمد والا بدر عيال خالتي

نواف..ههههههههههههههههههههه ليه طيب نسيتيني

تهاني وهي معصبه..شكلك غلطان انا ماعرف احد

في هالحظه ناديه منصدمه من الي تسمعه وسميه اخذتها برى الغرفه 

نواف..تهاني تذكرين يوم تقولين لي عمر العقل مادل على عمر الانسان 

تهاني انصدمت وفي بالها نواف بس قالت مستحيل اكيد اتحلم 

نواف..هااه وينك وش فيك

تهاني..من انت قول 

نواف..شوفي انا مادقيت الا بعد ما اخذت الاذن من اختك وهي الي قالت لي كل شي 

تهاني..يعني انت نواف

نواف..ايه انا هو ابي افهم وين وعدك لي انك تنجحين وتهتمين في دراستك 

تهاني وهي تبكي..بس ابوي مات وتركني

نواف..حتى انا ابوي مات وتركني وبعدين وش استفدت صحت عليه وتعبت وضيعت مستقبلي وفقدت امي وهذاني عشت بس انتي غير

تهاني..كيف غير

نواف..عندك خوات وام يحبونك واخو صغير يبي احد يهتم فيه لاتخليني اغير نظرتي فيك

تهاني..بس ما اقدر انساه

نواف..لا تنسينه بالعكس خلي هالشي حافز لك حققي حلم ابوك انك تتخرجين وتدخلين الجامعه وتصيرين في المكان الي يبيه

تهاني..بس ماتتركني مثله

نواف..كوني كبيره والي كاتبه لنا ربي بيصير وتراي مو مكلمك مره ثانيه وانتي الي بتدخلين الماسنجر وتكلميني انتظرك خلاص 

تهاني..خلاص اوعدك ارجع واجتهد واحقق الي ابوي يتمناه 

بعدها سكر نواف وجلست تهاني تبكي ومتضايقه لانها كانت تتمنى اطول معه وتتكلم اكثر وتفضي الي في داخلها ودخلت سميه عليها وناديه

سميه..والنهايه خلاص انا سويت هالشي علشان ترتاحين مو ترجعين تتضايقين 

تهاني وهي تبكي..سميه مثل ابوي والله مثل كلامه

سميه..خلاص اجل ريحي نفسك واحمدي ربك على هالانسان وادعيه انه يسخره لك وسوي الي طلبه منك بس وش قالك 

ناديه..ماتلاحظون اني غبيه بينكم فهموني

قالت سميه كل شي لناديه عن نواف وانه هو الي اتصل بطلب منها 

ناديه..ايييه لنا الله وين بنلاقي احد يخاف علينا ويسأل عني مثل بعض الناس

سميه..لا بالله ومن الي يجيني كل يوم المكتب يسأل عنك وعن احوالك قولي مدري

ناديه وهي منصدمه..من الي يسأل عني

سميه..بعدين تعرفين الحين الي ابيه منكم انتم الثنتين تغيرون من الي انتم فيه وارحمو امي يكفي انها في العده وحنا اغلب الوقت من مستشفى للثاني 

تهاني..خلاص برجع مثل قبل انشاءالله 

بعد هالاحداث 6 شهور تغيرو البنات تهاني صارت ثالث ثانوي بس قبل بداية الدراسه بشهر اتصل عمها على امها وقال انه فيه شاب طلب تهاني للزواج كانت بتنجن ماتبي تترك نواف وزعلت وكان الكل مستغرب من هالرجال بس عمها قال لامها إن هالرجال مو في المملكه واخوه هو الي جا يخطب بداله وانهم ناس كبار ويوم عرفت اسمه طلع نواف استانست بهالشي وعرفت انه شاريها وحبت تبين له انها قد كلمتها وبتجتهد وتجيب امتياز وبتدخل الطب مثل ماكان ابوها يتمنى 

في يوم وسميه في البيت اتصل عليها عمها 

سميه..هلا 

العم..السلام عليكم

سميه..وعليكم السلام

العم..اخبارك واخبار خواتك

سميه..بخير ولله الحمد

العم..سميه بقولك شي وهالمره ماراح اغصبك على شي والي تقولينه بيمشي

سميه..امر عمي وش تبي

العم..شوفي ولد عمك يبي يرجعك بس اليوم جاني واحد وطلبك وانت لكي حرية الاختيار بينهم بس الشخص الثاني فيه عيب

سميه..كيف فيه عيب 

العم..فيه عجز في رجوله ومايمشي الا على العكازات واسمه سعود

سميه كانت منصدمه وفي نفس الوقت مخيره بين ثنين يا فهد ولد عمها الي تكرهه او سعود الي كانت تعالجه ولو وافقت عليه بيقول الناس اكيد بينهم شي كانت محتاره وقالت لعمها بتفكر وترد عليه كان الكل يقول لها تاخذ ولد عمها وترجع له ولا تاخذ واحد عاجز عن المشي الا امها وخواتها قالو لها تاخذ سعود لان العاجز مايعيبه شي بعكس ولد عمها الي بتجيب منه عيال مرضى واحتمال مايعيشون وفي النهايه قررت تاخذ سعود لانه على كلامها العاجز انسان مسلم ويصلي ويصوم ورضي في امه اما عجز الرجول مافيها شي ولا يعتبر عيب وبعدين عرفت انه سمع الكلام الي دار بينها وبين فهد 

ناديه في الجامعه وقبل امها قالت لها عن بدر وانه يبيها بس الى الان مو مقتنعه بها الشي 

ساره..ناديه لاتخليني ارتكب فيك جريمه

ناديه..ليه طيب وش سويت 

ساره..ياعالم الاقي احد يبيني ومصر ياخذني واتركه 

ناديه..مو مقتنعه فيه

ساره..يالخبله خذي واحد يبيك ولا تاخذين واحد مختارينك اهله له ومغصوب عليك

ناديه..هذا رايك 

ساره..ايه واستخيري وشوفي وش يصير

بعد اسبوع من الاستخاره والتردد وافقت ناديه على بدر بشرط إن امها واخوها يكونون ساكنين معها وبدر ماصدق على الله وافق على طول لان شرطها مايقدر يرفضه خاصه انها خالته الي ربته ومثل امه مستحيل يتركها 


بعد سنه تهاني في الفصل الثاني من الثانويه العامه وناديه مستوى رابع في الجامعه وتنتظر تتخرج وتتزوج هي وبدر سميه تزوجة في عيد الفطر وحامل وعايشه بسعاده مع زوجها ومستانسه معه




النهايه...


المستفاد من القصه...

1..احيانا زواج الاقارب يسبب كثير من المشاكل وكل ما ابتعد الشخص يكون احس

2..البنت الي تصور اي شخص تثق ان الدنيا دواره ولازم يجي وقت ويصورها احد او يصور شخص من اقاربها 

3..علاقات النت كثيررررر من الناس ينظرون منها بس فيه القله مثل تهاني ربي يرزقها برجال يحافظ عليها ويحميها من هالعالم 

4..المواضيع في المنتديات تفيد ناااس كثيره فلازم يكون موضوعك مفيد لهم <<<<سامعين يالي في الجاده 

5..المعاق ليس عاجز مثل ما البعض يتوقع بالعكس عنده اشياء تعوض هالعجز ويصبح فعال في المجتمع 

6..البنت الي تبتعد عن المعاق وترفض تتزوجه تثق ثقه تامه انها لو خسرته راح تخسر الي يجي بعده لان المعاق يحاول يعوضها عن اشياء كثير ومايحسسها بالي فيه 

جميع الحقوق محفوظه:

===============
لمزيد من القصص تجدوها في 
 موقع دنيا الألماس
http://www.s12345.wapka.mobi/
===============